İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 193 Hüküm no: 156 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Semaven v. Manol’un Eskici Esnafı Kethudası Ahmed Ağa ve sairleri aleyhindeki eskici dükkânı gediği davasında anlaşma sağlanması Eskicilerin mâddesi Ma‘rûz Sâhib-i arzuhâl eskici tâiesinden Semaven v. Manol nâm zimmî bi’t-terâzî meclis-i şer‘-i münîrde Eskici esnâfının kethudâsı Ahmed Ağa b. Ebûbekir ile zimmî ustalarından Parmakkapı Yiğitbaşısı Avadis v. Agob ve Dikilitaş Yiğitbaşısı Filibos v. Ohannes ve Odunkapısı Yiğitbaşısı Yasef v. Praşkova ve Vezneciler Yiğitbaşısı Manuk v. Karabet ve Parmak[kapılı] Lecin v. Serkiz ve Vezir Hanı kurbünde Karabet v. Sahak ve Kirkor v. Ohannes ve Karabet v. Markiryos ve Bedros v. Bogasir ve sâir mazbûtü’l-esâmî zimmîler muvâcehelerinde Âsitâne-i aliyye’de Dikilitaş nâm mahal ile Dîvânyolu’nda kâin iki bâb eskici dükkânları derûnlarında mevcûde beyne’l-hıref gedik ta‘bîr olunur iki bin beş yüz guruş kıymetli eskici âlât-ı lâzımemi fuzûlî zabt ve esnâf-ı merkūmûn bi’l-ittifâk âhara bey‘ ile istihlâk etmeleriyle defa‘âtle da‘vâ ve beynimizde münâza‘ât-ı kesîre ve muhâsamât-ı vefîre vâkı‘a olmuş idi. El-hâletü hâzihî beynimize muslihûn tavassut ve esnâf-ı merkūmûn ile iki yüz guruş bedel-i makbûza sulh olup mâ‘adâya ve bi’l-cümle gedik husûsuna müte‘allika âmme-i de‘âvî ve kâffe-i mutâlebâtdan esnâf-ı merkūmûnun ve sâir mazbûtü’l-esâmî kimesnelerin zimmetlerini ibrâ-yı âm ile ibrâ ve iskāt-ı hak eylediğimde merkūmûndan her biri kendileri tarafından asâleten ve sâirleri tarafından vekâleten ibrâ-yı mezkûrumu ba‘de’l-kabûl mesfûr Semaven’in güveyisi Ohannes nâm zimmî ba‘de’l-yevm mesfûr Semaven husûs-ı mezkûr için esnâf-ı merkūmûndan da‘vâ sadedinde olur ise bedel-i sulh olan meblağ-ı merkūm iki yüz guruşun mikdâr-ı mehûzuna ben kefîl ve zâminim dedikde esnâf-ı merkūmûn dahi mersûm Ohannes zimmînin kefâletini kabûl ve bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 7 Z sene 1222