İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 200 Hüküm no: 163 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazi Sultan Abdülhamid Han’ın Beylerbeyi ve Mirgünoğlu’nda bulunan fırın ile padişahın annesi Gümrükçü Çiftliği’ndeki fırın ile Çelebi Hasan Paşa vakfından Kumkapı civarındaki fırınlara francala imali izni verilmesi Francala fırını güşâdı Ma‘rûz Bundan akdem sicill-i mahfûzda mukayyed mahâll-i ma‘lûmede yedi aded francala fırınları îkād mâ‘adâsı bi’l-külliye men‘ ü def‘ ve sedd ü bend olunmuş olmağla el-hâletü hâzihî beyaz üzerine musahhah bu dâ‘îlerine hitâben sâdır olan emr-i âlîlerinde cennet-mekân firdevs-âşiyân Gāzi Sultan Abdülhamid Han hazretlerinin Beylerbeyi ve Mîrgünoğlu nâm mahallerde müceddeden binâ ve inşâ buyurdukları cevâmi‘-i şerîfe ve âsâr-ı celîleleri evkāfından mahâll-i merkūmede vâki‘ iki aded fırancalacı fırınları ve mehd-i ulyâ-yı saltanat devletlü ismetlü efendimiz hazretlerinin mülkiyet üzere mutasarrıfe oldukları Topçular civârında Gümrükçü Çiftliği derûnunda kâin bir bâb fırancalacı fırını ve Çelebi Hasan Paşa Vakfı’ndan Kumkapı hâricinde vâki‘ İstefan ve Ohannes ve Haçador nâm zimmîlerin mutasarrıf oldukları kezâlik bir bâb fırancalacı fırını ki cem‘an dört aded fırınların sedd ü bendi iktizâ etmez iken mukaddemce ma‘lûmü’l-ism yedi aded fırancalacı fırını ibkāsıyla mâ‘adâsının bâ-irâde-i seniyye hîn-i seddinde bunlar dahi adem-i vakitden nâşi sehve mebnî sedd ü bend olunmuş ise dahi işbu dört aded fırınları sâire makīs olmayıp evkāf-ı şerîfe-i mezkûreden olmalarıyla bu keyfiyet evkāf-ı mezkûreye gadrı mûcib ve îrâdlarının kesr ve tedennîsini müstevceb olduğuna binâen sâire sirâyet etmemek ve bir vakitde emsâl olarak kaydı derkenâr olunmamak şartıyla fakat bâlâda mezkûr dört aded fırınların küşâdıyla on bir adede iblâğı husûsunda bu def‘a irâde-i kat‘iyye-i cihân-dârî ta‘alluk etmekle imdi şurût-ı muharrere-i mezkûre indirâcıyla ancak işbu dört aded francalacı fırınlarının küşâdına ruhsatı hâvî kaleminden emr-i şerîf ısdâr ve evkāf-ı şerîfe-i mezkûre ve sâir iktizâ eden mahallere “ilmühaberleri i‘tâsını i‘lâma müsâra‘at eyleyesiz” deyü sâdır olan emr-i âlî-yi cihân-mutâ‘larına imtisâlen cennet-mekân firdevs-âşiyân -aleyhi’r-rahmetü ve’l-gufrân- Gāzi Sultan Abdülhamid Han hazretlerinin binâ ve inşâsına muvaffak oldukları cevâmi‘-i şerîfe ve âsâr-ı celîleleri evkāfından Beylerbeyi ve Mîrgünoğlu nâm mahallerde iki aded mehd-i ulyâ-yı saltanat devletlü ismetlü iffetlü -dâmet ismetühâ ve zâdet iffetühâ- efendimiz hazretlerinin mâlik oldukları Topçular kurbünde Gümrükçü Çiftliği demekle arîf çiflik derûnunda kâin bir bâb fırancalacı fırını ve Çelebi Hasan Paşa Vakfı’ndan Kumkapı hâricinde İstefan ve Ohannes ve Haçador nâm zimmîlerin fırını bir aded ki cem‘an dört aded fırınları fi’l-hakīka vakf-ı müşârün-ileyhe kesr ve noksân terettüb etmemekle sâire sirâyet etmeyip ve bir vakitde emsâl olarak kaydı derkenâr olunmamak şartıyla işbu dört aded fırancala fırınlarının küşâdıyla bundan akdem ibkāsı irâde-i seniyye-i kat‘iyye-i cihân-bânî buyurulan Âsitâne-i aliyye’de Bahçekapısı’nda bir aded ve Şimkeşhâne’de bir aded ve Sarıgez’de Sekbân değirmenine merbût bir aded ve Eyüb’de Taşlıburun’da bir aded ve Galata’da Beyoğlu’nda Terazidibi nâm mahâlde bir aded ve Galata’ya muzâfe Tophâne’de Aşağıhendek? nâm mahâlde bir aded ve Üsküdar’da Ayazma’da bir aded ki cem‘an on bir aded fırancala fırınlarına münhasıra ve münâsib olmağla yedlerinde olan emr-i âlînin cemî‘ şurûtunu derc ile İstanbul ve Galata ve Eyüb ve Üsküdar kādılarına ve Dergâh-ı âlî sekbânbaşısı ve hâssa bostancıbaşısı ve Galata Voyvodasına hitâben yedlerine müceddeden tuğrâ-yı garrâyı hâvî emr-i âlî-i cihân-mutâ‘ları i‘tâ olunup ve evkāf-ı şerîfeler taraflarına ve muktezî olan sâir mahallere ilmühaberleri verilmesi iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 25 Z sene 1222