İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 206 Hüküm no: 171 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed ile Çiftçi Sarı Hüseyin arasındaki alacak davası Çubuk semeni mâddesi mazbatadan ihrâç, Ma‘rûz İstanbul’da Nuruosmanî kurbünde Vezir Hanı’nda sâkin çubuk tüccârından derûn-ı arzuhâlde mezkûrü’l-ism el-Hâc Ali b. el-Hâc Mehmed nâm kimesne meclis-i şer‘-i münîrde Çiftçi tâifesinden Sarı Hüseyin b. Veliyüddin nâm Kıbtî muvâcehesinde benim mezbûr Hüseyin zimmetinde bundan akdem yedimden ve malımdan iştirâ ve kabz eylediği aded ve fiyâtı beynimizde ma‘lûm çubuk semeninden bâ-i‘lâm-ı şer‘î mahkûmün-bih bin altı yüz dokuz guruş alacak hakkımın yedi yüz kırk altı guruşunu mezbûr Hüseyin’e bundan akdem nehâren i‘mâl etdirdiğim ma‘lûmü’l-aded çubukların ücretinden zimmetimde deynim olan yedi yüz kırk altı guruşa takasen fürû-nihâde ve tenzîl olunup bâkīsi olan sekiz yüz altmış üç guruşu mezbûr Hüseyin’den taleb ederim deyü ba‘de’d-da‘vâ ve’l-istintâk merkūm Hüseyin cevâbında husûs-ı mezkûru ber-vech-i muharrer ikrâr, lâkin ben müdde‘î-i mezbûra ba‘de’l-mağrib sâ‘at sekize kadar beş guruş ücret tesmiyesiyle yüz seksen geçe çubuk i‘mâl etmemle müddet-i mezkûrede ecr-i müsemmâmdan müctemi‘ olan dokuz yüz guruşun sekiz yüz altmış üç guruşu deyn-i mezkûruma takas [22a] ve mahsûb olunup ziyâde olan otuz yedi guruşu dahi taleb ederim deyü sûret-i def‘de eylediği da‘vâsı beyâna havâle olunup lâkin tarafeyn bir dahi meclis-i şer‘a gelmemeleriyle henüz da‘vâlarına faysal verilmediği vekāyi‘ kâtibimiz cerîdesinde mazbût olmağın imtisâlen li-’l-emri’l-âlî sûret-i zabtı ihrâc ve İstanbul Mahkemesi’nden huzûr-ı âlîlerine i‘lâm olundu. Fî 2 min-Muharrem sene 1223.