İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 212 Hüküm no: 179 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Seyyid Mustafa Efendi’nin kira artırmak maksadıyla çilingir dükkânı kiracısı Nikigos v. Kabril’i dükkândan çıkaramayacağı Haseki Hamamı’nda çilingir dükkânına müte‘allik Ma‘rûz Sâhib-i arzuhâl eş-Şeyh es-Seyyid Mustafa Efendi b. Ebîbekir nâm kimesne meclis-i şer‘-i münîrde İstanbul’da Ketenciler başı nâm mahâlde Haseki Hamamı ittisâlinde kâin Kasık Yağcı ta‘bîr olunur bir bâb çilingir dükkânında beher şehr yüz on para kirâ ile müstecir olan Nikigos v. Gabril nâm zimmî muvâcehesinde çilingir esnâfının kethudâsı es-Seyyid Yakub Ağa ve Yiğitbaşı Matos ve ihtiyârlarından Artin Usta ve Bedros Usta ve Mardıros Usta ve Serope Usta ve sâirleri hâzır oldukları hâlde mersûmûn müstecir olduğu dükkân bâ-temessük-i mütevellî benim taht-ı tasarrufumda ve dükkân-ı mezkûr bundan akdem bi-kazâillâhi te‘âlâ muhterik olup gediği mahv olduğuna binâen ben dükkân-ı mezkûru binâ ve tahammülü mertebe kirâ ile esnâf-ı âhara îcâr irâdesinde iken benim haber ve âgâhım olmaksızın mersûm Nikigos zimmî malından teberru‘an li’l-vakf meblağ sarfıyla fuzûlî binâ ve dükkân-ı mezkûrda müsteciren mütemekkin olup ve ben işbu târih-i i‘lâm-ı şehrî gāyetinde fesh-i akd-i icâre etmemle dükkân-ı mezkûru gāyet-i şehirden tahliye ve bana teslîme tenbîh olunmak murâdımdır deyü ba‘de’d-da‘vâ ve’s-suâl mersûm Nikigos zimmî cevâbında benim müstecir olduğum dükkân-ı mezkûrun gediği mu‘teber ve mukayyed gediklerden olup hattâ işbu esnâf-ı hâzırûn-ı merkūmûnun yedlerinde olan bâlâsı tuğrâ-yı garrâ-yı cihân-dârî ile müveşşah fermân-ı âlî-şânda mastûr ve musarrah olup ancak mülk sâhibleri gedik mâliki müstecirlerini kirâ artırmak dâ‘iyesiyle ihrâçlarına tasaddî etmemek şurût-ı nizâm-ı mu‘teberemizdendir deyü mazmûnu min-külli’l-vücûh takrîrine mutâbık esnâf-ı hâzırûn-ı merkūmûn ibrâz eyledikleri emr-i mezkûrun mazmûnunu müdde‘î-i mezbûr eş-Şeyh es-Seyyid Mustafa Efendi bi-tamamihi tâyi‘an ve kat‘iyyen ikrâr ü i‘tirâf etmeğin ber-mûceb-i emr-i âlî müstecir-i mersûm Nikigos zimmînin kirâ artırmak dâ‘iyesiyle dükkân-ı mezkûrdan bî-vech ihrâcına ta‘arruz etmemek iktizâ eylediği müdde‘î-i mezbûre tefhîm olunduğu İstanbul Mahkemesi’nden huzûr-ı âlîlerine i‘lâm olundu. Fî 25 Zilhicceti’ş-şerîfe sene 1222.