İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 211 Hüküm no: 178 Orijinal metin no: [22b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Anton v. Zaharyo’nun kızı Zoye’nin Yorgi v. Dimo aleyhindeki alacak davasının reddedilmesi Kocamustafapaşa’da bakkāl Ma‘rûz Bundan akdem hâlik olan Anton v. Zaharyo nâm zimmînin sulbiye kebîre kızı sâhibe-i arzuhâl şahsı mu‘arrefe Zoyi nâm Nasrâniye meclis-i şer‘-i münîrde kapamacı tâifesinden Yorgi v. Dimo nâm zimmî muvâcehesinde İstanbul’da Kocamustafapaşa kurbünde vâki‘ el-Hâc Ali Ağa dükkânı demekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla doksan sehmi âharın ve otuz sehm-i şâyi‘i babam hâlik-i mesfûrdan [23a] mevrûs benim yedimde mülküm iken mersûm Yorgi zimmî tarafımdan vekâleten dükkân-ı mezkûr derûnunda yedi seneden beri müstecir bulunanlardan benim için senevî doksan guruşdan sinîn-i mezkûrede altı yüz otuz guruş kabz edip bana vermemekle meblağ-ı merkūmu mersûm Yorgi zimmîden taleb ederim deyü ba‘de’d-da‘vâ ve’l-inkâr müdde‘iye-i mesfûre ber-vech-i muharrer müdde‘âsına ikāmet-i beyyine edemeyip bi’t-taleb mersûm Yorgi zimmî bi’l-muvâcehe vech-i şer‘î üzere tahlîf olunmağın mûcebince müdde‘iye-i mesfûre Zoyi Nasrâniye da‘vâ-yı mezkûresiyle mersûm Yorgi zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 14 Zilhicceti’ş-şerîfe sene 1222.