İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 213 Hüküm no: 181 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dramalı Seyyid Abdurrahman Beşe’nin tütüncülük şirketinden ortakları olan Tütüncü Ömer Ağa ve Hıristo v. Yorgi’nin zimmetlerini ibra etmesi Tütüncülük şirketinden ibrâ Ma‘rûz Derûn-ı arzuhâlde mezkûrü’l-ism Dramalı es-Seyyid Abdurrahman Beşe b. es-Seyyid Mehmed Tâhir nâm kimesne bi’t-terâzî du‘âhânede ma‘kūd meclis-i şer‘-i münîrde sâbıkā şerîkleri sâhibey-i arzuhâl Tütüncü Ömer Ağa b. Mehmed tarafından husûs-ı âtîde vekîl-i sâbitü’l-vekâlesi Mehmed Ağa b. el-Hâc İsmail ile Hıristo v. Yorgi zimmî muvâcehelerinde ben târih-i i‘lâmdan iki sene mukaddem merkūmân Ömer Ağa ve Hıristo zimmî ile fâide-i hâsıla beynimizde islâsen olmak üzere tütüncülük ticâretinde bir sene şerîkler olup ba‘dehû fesh-i akd-i şirket birle hesâbımızı rü’yet eylediğimizde benim re’s-i mâl ve fâide-i hâsıladan hisseme isâbet eden ma‘lûmü’l-mikdâr meblağı ahz ü kabz etmiş idim. Lâkin hesâbımızda galat vâki‘ olmağla müddet-i mezkûrede kendi sülüs hissem için merkūmândan bin yüz yetmiş guruş fâide-i hâsıla taleb ederim deyü tasaddî eylediğim da‘vâmdan bâ-vesâtet-i muslihîn merkūmân Ömer Ağa dahi [Hıri]sto zimmî ile bi’t-tav‘ ve’r-rızâ yüz guruş bedel-i medfû‘ ve makbûza ba‘de akdi’l-musâlaha ve’l-kabûl ziyâde bin yetmiş guruşa ve bi’l-cümle husûs-ı mezkûra ve hesâbda galat vukū‘una ve işbu târih-i i‘lâma gelince sâir cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika mutlakan âmme-i de‘âvî ve kâffe-i mutâlebâtdan merkūmân Ömer Ağa ve Hıristo zimmînin zimmetlerini şurût-ı müfside ve uhûd-ı mubtıladan ârî ve cebr ve kerîhden hâlî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile kabûllerini hâvî ibrâ ve iskāt eyledim deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî 3 min-Muharrem sene 1223.