İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 214 Hüküm no: 182 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mustafa Beşe’ye olan borcunu ödemesi hususunda Ali Beşe’ye tenbihte bulunulması 3160 guruş hüküm Ma‘rûz Sâhib-i arzuhâl Esirci Mustafa Beşe b. Ahmed nâm kimesne meclis-i şer‘-i münîrde derûn-ı arzuhâlde mezkûrü’l-ism tüccârdan Ali Beşe b. Ömer nâm kimesne muvâcehesinde mezbûr Ali Beşe zimmetinde târih-i i‘lâmdan iki sene mukaddem Bahr-ı siyâh cânibinde Anapa kasabasında yedimden ve malımdan iştirâ ve kabz eylediği aded ve fiyâtı beynimizde ma‘lûm çit ve astar ve bogasi ve sahtiyân semenlerinden cem‘an üç bin yüz altmış guruş alacak hakkım olmağla meblağ-ı merkūmu mezbûr Ali Beşe’den taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan mârrü’z-zikr Anapa kasabası ahâlisinden bu esnâda Âsitâne-i aliyye’ye gelen Osman Beşe b. Hüseyin ve Süleyman Beşe b. Ali nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezkûr üç bin yüz altmış guruşu müdde‘î-i mezbûr Mustafa Beşe’ye edâ ve teslîme merkūm es-Seyyid Ali Beşe’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 6 min-Muharremi’l-harâm sene 1223.