İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 242 Hüküm no: 209 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali’nin Çubukçu Sarı Hüseyin aleyhindeki çubuk ücreti davasından ferâgat etmesi Çubuk nizâ‘ından meccânen birbirini ibrâ Ma‘rûz İstanbul’da Nuruosmaniye kurbünde Vezir Hanı’nda sâkin çubuk tüccârından derûn-ı arzuhâlde mezkûrü’l-ism el-Hâc Ali b. el-Hâc Mehmed nâm kimesne meclis-i şer‘-i münîrde sâhib-i arzuhâl Çubukçu tâifesinden Sarı Hüseyin b. Veliyüddin nâm Kıbtî muvâcehesinde mezbûr Hüseyin zimmetinde bundan akdem yedimden ve malımdan iştirâ ve kabz eylediği aded ve fiyâtı beynimizde ma‘lûm çubuk semeninden bâ-i‘lâm-ı şer‘î mahkûmün-bih bin altı yüz dokuz guruş alacak hakkımın yedi yüz kırk altı guruşu mezbûr Hüseyin’e bundan akdem nehâren i‘mâl etdirdiğim ma‘lûmü’l-aded çubukların ücretinden zimmetimde deynim olan yedi yüz kırk altı guruşa takasan fürû-nihâde ve tenzîl olunup bâkīsi olan sekiz yüz altmış üç guruşu mezbûr Hüseyin’den taleb ederim deyü tasaddî eylediğim da‘vâ-yı mezkûremden bâ-vesâtet-i muslihîn mezbûr Hüseyin ile bi’t-tav‘ ve’r-rızâ dört yüz guruş bedel-i medfû‘ ve makbûza ba‘de akdi’l-musâlaha ve’l-kabûl ben mâ‘adâ dört yüz altmış üç guruşa ve işbu târihe gelince sâir beynimizde cereyân eden cemî‘ hukūk-ı şer‘iyeye müte‘allika mutlakan âmme-i de‘âvî ve kâffe-i mütâlebâtdan mezbûr Hüseyin’in zimmetini, ol dahi benden ba‘de’l-mağrib sâ‘at sekize kadar sana beşer guruşa ücret tesmiyesiyle yüz seksen gece çubuk i‘mâl etmemle müddet-i mezkûrede ecr-i müsemmâmdan müctemi‘ olan dokuz yüz guruş taleb ederim deyü eylediğim da‘vâsından meccânen fâriğ olmağla husûs-ı mezkûra ve sâire müte‘allika âmme-i de‘âvîden benim zimmetimi her birimiz ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde ikrâr ve i‘tirâf edip bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlilerine i‘lâm olundu.] Fî 24 Muharrem sene 1223.