İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 241 Hüküm no: 208 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın eşi Bostânî Seyyid İbrahim Ağa’dan boşanması İsbât-ı tatlîk Ma‘rûz Sâhibe-i arzuhâl mu‘arrefetü’z-zât Hadice bt. Abdullah nâm hatun evvelâ Çarşamba günü Arz Odası’nda huzûr-ı hazret-i kāimmakām-ı âlî-makāmda ve ba‘dehû dâ‘iyânemizde ma‘kūd meclis-i şer‘-i münîrde derûn-ı arzuhâlde mezkûrü’l-ism Bostânî es-Seyyid İbrahim Ağa b. Mehmed nâm kimesne muvâcehesinde mezbûr es-Seyyid İbrahim Ağa zevc-i dâhilim olup târih-i i‘lâmdan üç ay mukaddem beni bâyinen tatlîk etmekle zimmetinde mütekarrir ve ma‘kūdün-aleyh olan iki yüz guruş mehr-i müeccelimi mezbûr es-Seyyid İbrahim Ağa’dan taleb ederim deyü ba‘de’d-da‘vâ ve’l-istintâk mezbûr es-Seyyid İbrahim Ağa cevâbında müdde‘iye-i mezbûra ol-mikdâr guruş mehr-i müeccel tesmiyesiyle zevce-i medhûlün-bihâsı olduğunu ikrâr tatlîkini ba‘de’l-inkâr müdde‘iye-i mezbûre ber-vech-i muharrer müdde‘âsını her biri mahâllinde lede’t-tezkiye adl ve makbûlü’ş-şehâde idükleri ihbâr olunan Mehmed Beşe b. Ali ile zâtları mu‘arrefe Emine bt. Abdullah ve diğer Emine bt. İbrahim nâm hatunlar şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince müdde‘iye-i mezbûre Hadice Hatun’un talâkına ba‘de’l-hükm mehr-i müeccel-i mezkûr iki yüz guruşu dahi müdde‘iye-i mezbûreye edâ ve teslîme mezbûr es-Seyyid İbrahim Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 28 Muharrem sene 1223.