İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 243 Hüküm no: 211 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Seyyid Hafız Mustafa’nın, Serope v. Abraham aleyhindeki terzi dükkânı gediği davasının meşru olmadığı Du‘â Meydanı kurbünde Terzi Gediği da‘vâsından men‘ Ma‘rûz Derûn-ı arzuhâlde mezkûrü’l-ism Derzi esnâfından es-Seyyid Hafız Mustafa b. es-Seyyid Mehmed nâm kimesne evvelâ Çarşamba günü dîvân-ı âlîde ve ba‘dehû du‘âhânemizde ma‘kūd meclis-i şer‘-i münîrde İstanbul’da Du‘a Meydanı nâm mahâlde Kavukçular kurbünde Çukacı Aci Manuk ve Çukacı Aci Agob zimmîler dükkânları beynlerinde vâki‘ bir bâb Derzi dükkânında beher şehr altmış beşer para kirâ ile müşâhereten müstecir ve derûnunda mevcûd gedik âlât-ı lâzıme-i ma‘lûmesine bâ-hüccet vaz‘-ı yedi mütehakkık olan yine esnâf-ı merkūmeden kezâlik derûn-ı arzuhâlde mersûmü’l-ism Serope v. Abraham zimmî muvâcehesinde dükkân-ı mezkûr mutasarrıfı sâhib-i arzuhâl Cezâyirli el-Hâc Mehmed b. Ahmed nâm kimesne hâzır olduğu hâlde dükkân-ı mezkûrun hevâyî gediği aklâmdan birinde mukayyed olmayarak babam mezbûr es-Seyyid Mehmed’in olup ba‘de vefâtihî bana mevrûs olmuş iken dükkân-ı mezkûr mutasarrıfı hâzır-ı mezbûr el-Hâc Mehmed işbu târihden on sekiz sene mukaddem dükkân-ı mezkûru mesfûr Serope zimmîye şehriye altmış beşer paraya îcâr ve derûnunda malından vaz‘ eylediği bir destgâh ve bir mikrâs ve bir endâze ve bir pîş-tahta ve bir sagīr minderi gedik i‘tibâr edip iki yüz guruş semen-i medfû‘ ve makbûza bâ-hüccet bey‘ ve temlik ve teslîm eylediğinde ol dahi ber-vech-i muharrer istîcâr ve iştirâ ve temellük ve tesellüm ve kabûl ve ilâ-hâzihi’l-ân derûnunda mütemekkin olup ve ben ve gerek babam müteveffâ-yı mezbûr es-Seyyid Mehmed ve mesfûr Serope zimmî cümlemiz Âsitâne-i aliyye’de sâkineler olup husûs-ı mezkûru müddet-i mezbûrede da‘vâ mümkün iken etmeyip bilâ-özr sükût etmiş idik. Hâlâ mersûm Serope zimmî gedik-i mezkûrdan keff-i yed birle bana teslîme ve dükkân-ı mezkûrdan hurûcuna tenbîh olunmak matlûbumdur deyü takrîr-i meşrûhu üzere tasaddî eylediği da‘vâsı vücûhla meşrû‘a ve iltifâta şâyân olmadığı müdde‘î-i mezbûra tefhîm ve da‘vâ-yı mezkûresiyle mersûm Serope zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 28 Muharrem sene 1223.