İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 244 Hüküm no: 212 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırımlı Osman’ın, Kuruyemişçi Seyyid Hacı Ahmed aleyhindeki kuruyemiş davasında haksız olduğu Kuruyemiş nizâ‘ından mu‘ârazadan Ma‘rûz Sâhib-i arzuhâl Kırımî Osman b. Mustafa nâm kimesne evvelâ Çarşamba günü Dîvân-ı âlîde ve ba‘dehû du‘âhânemizde ma‘kūd meclis-i şer‘-i münîrde derûn-ı arzuhâlde mezkûrü’l-ism Kuruyemişci es-Seyyid el-Hâc Ahmed Ağa b. es-Seyyid Ali nâm kimesne muvâcehesinde ben ve şerîklerim gāibân ani’l-meclis Müslim b. İbrahim ve Emrullah b. İbrahim nâm kimesneler bin iki yüz yirmi bir senesi Ramazani’l-mübâreki gurresinde mezbûr es-Seyyid el-Hâc Ahmed Ağa yedinden beher kantarı on altışar guruşa olmak üzere yüz iki kantar kırk dört lodra siyâh üzüm ve kezâlik beher kantarı yirmi altışar guruşa olmak üzere altmış bir kantar seksen altı lodra razaki üzümü ve kezâlik beher kantarı on sekizer guruşa olmak üzere kırk iki kantar doksan altı lodra Lop? inciri ve kezâlik bir kantar kalem inciri cem‘an dört bin sekiz yüz on sekiz guruş üç paraya Niş’te iştirâken iştirâ ve kabz eylediğimizden elli bir gün mürûrunda biz bâyi‘-i mezbûr ile bey‘-i mezkûru beynimizde bi’t-terâzî fesh ve ikāle birle zikr olunan üzüm ve inciri mezbûra teslîm eylediğimizde mezbûr es-Seyyid el-Hâc Ahmed Ağa bizden pişmanlık nâmıyla beş yüz guruşumuzu ahz ü kabz etmekle makbûzu olan meblağ-ı merkūm beş yüz guruşdan benim hisseme isâbet eden yüz altmış altı guruş seksen akçeyi mezbûrdan taleb ederim deyü ba‘de’d-da‘vâ ve’l-istintâk mezbûr es-Seyyid el-Hâc Ahmed Ağa cevâbında müdde‘î-i mezbûr ile şerîkleri gāibân-ı merkūmân sâlifü’z-zikr üzüm ve inciri benden ba‘de’l-iştirâ semenlerine noksân terettüb eylediği hâlde müddet-i mezkûre mürûrunda üç bin sekiz yüz on yedi guruşa bey‘-i cedîd ile bana bey‘ ve teslîm, ben dahi ba‘de’l-iştirâ ve’t-takābîz semen-i mezkûrdan bana deynleri olan meblağ-ı merkūm dört bin sekiz yüz on sekiz guruş üç paranın ol-mikdârına takas eylediklerinde, ben dahi mukābele ve kabûl edip bâkī kalan bin bir guruş üç paranın dahi beş yüz guruşunu bana edâ ve teslîm etmeleriyle mâ‘adâsı olan beş yüz bir guruş üç parayı ben sene-i sâbıkā Muharrem’inin yirmi birinci günü İstanbul Bâb Mahkemesi’nde nâibü’ş-şer‘ olan müderrisîn-i kirâmdan es-Seyyid İbrahim Efendi huzûrunda merkūmûndan da‘vâ eylediğimde onlar dahi meblağ-ı merkūmu benden da‘vâ ve ol-vechile beynimizde ba‘de vukū‘i’l-münâza‘a bâ-tavassut-ı muslihîn her birimiz tasaddî eylediğimiz da‘vâ-yı mezkûremizden meccânen fâriğler olup bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ-yı âmm-ı sahîh-i şer‘î ile kabûlü hâvî ibrâ ve iskāt eyledik deyü mefhûmu takrîrine mutâbık ve nâib-i mezbûrun hâtemini hâvi ibrâz eylediği bir kıt‘a i‘lâm-ı şer‘înin mazmûnunu ve sûret-i def‘de eylediği ibrâ da‘vâsını herbiri lede’t-tezkiye adl ve makbûlü’ş-şehâde idükleri ihbâr olunan es-Seyyid Mehmed Ağa b. Halil ve Mustafa Ağa b. Mahmud ve es-Seyyid Ahmed Ağa b. Salih ve Hafız Mehmed Ağa b. İbrahim nâm kimesneler şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince müdde‘î-i mezbûr Osman da‘vâ-yı mezkûresiyle merkūm es-Seyyid el-Hâc Ahmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 4 S sene 1223.