İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 251 Hüküm no: 217 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun ve kardeşi Ayşe Hanım’ın arpa döğücü dükkânı ve menzili nöbetleşe kullanmaları Muhâyâya râzı Ma‘rûz İstanbul’da Müftü Hamamı kurbünde sâkine Emine Hatun bt. el-Hâc Mehmed’in zevci ve tarafından husûs-ı âtîde vekîl olduğu zâtını ârifân Hüseyin Ağa b. Halil ve Mehmed Sadık Ağa b. Abdurrahman nâm kimesneler şehâdetleriyle sâbit olan Mehmed Ağa b. Abdullah meclis-i şer‘-i münîrde müvekkile-i mezbûrenin li-ümmin karındaşı zâtı mu‘arrefe Âişe bt. Mustafa nâm hatun mahzarında İstanbul’da Kapan-ı dakīk hâricinde vâki‘ ma‘lûmü’l-hudûd bir bâb hınta ve şa‘îr döğücü dükkânı ve ittisâlinde kâin bir bâb mahzen müvekkilem zevcem mezbûre Emine Hatun ile merkūme Âişe Hatun’un bi’l-münâsafe bâ-temessük-i mütevellî bi’l-icâreteyn taht-ı tasarruflarında ve derûnlarında mevcûde gedik âlât-ı lâzımesi kezâlik ale’l-iştirâki’s-seviyy yedlerinde mülkleri olup lâkin zikr olunan dükkân ve mahzeni sekiz seneden beri merkūme Âişe Hatun tasarruf etmekle mârrü’l-beyân dükkân ve mahzen muhâyât tarîkiyle evvelâ müvekkilem zevcem mezbûre Emine Hatun ve sâniyen merkūme Âişe Hatun tasarruf etmek üzere tenbîh olunmak müvekkilem mezbûrenin matlûbudur deyü bi’l-vekâle da‘vâ etdikde ol dahi cevâbında bi-tamamihâ ikrâr ü i‘tirâf lâkin evvelen ben tasarruf etmek murâdımdır deyüp akd-i muhâyeeye tarafeyni terâzî ve ittifâk edip ancak evvel ve sânîde mu‘ârız eylediklerinde meclis-i şer‘de kur‘a tarh olundukda evvel müvekkile-i mezbûre Emine Hatun’a ve sânî merkūme Âişe Hatun’a zuhûr etmekle işbu târih-i i‘lâm-ı şehrî Saferi’l-hayrın on üçüncü gününden i‘tibâr ile evvelâ bir sene müvekkile-i mezbûre Emine Hatun ve sâniyen bir sene merkūm Âişe Hatun tasarruf edip ahadühümâ âharın zamanına ta‘arruz etmemek iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 5 S sene 1223.