İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 252 Hüküm no: 219 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Seyyid Ahmed Ağa’ya olan borçlarını eşi Ayşe Hanım’a ödemeleri hususunda Molla Osman ve Molla Mustafa’ya tenbihte bulunulması 500 guruşa asâleten ve kefâleten hüküm. Ma‘rûz Kuruyemişçi esnâfından olup bundan akdem vefât eden es-Seyyid Ahmed Ağa b. Ali’nin zâhirde zevce-i menkûha-i metrûkesi Âişe bt. Ahmed nâm hatundan gayrı vâris-i ma‘rûf ve ma‘rûfesi olmamağla terekesinin rub‘u zevcesi mezbûreye selâse-i erba‘ı cânib-i beytü’l-mâla âid ve râci‘ oldukdan sonra mezbûre Âişe Hatun tarafından husûs-ı âti’l-beyânda vekîl olduğu zâtını ârifân Alemdar Mustafa Ağa b. Mahmud ve es-Seyyid Mehmed ağa b. Halil nâm kimesneler şehâdetleriyle sâbit olan es-Seyyid Ahmed Ağa b. Mehmed Salih nâm kimesne meclis-i şer‘-i münîrde Kırım ahâlisinden Molla Osman b. Mustafa ve Molla Mustafa b. Abdullah nâm kimesneler muvâcehelerinde müvekkilem mezbûrenin mûrisi zevci müteveffâ-yı merkūmun mezbûrân Molla Osman ve Molla Mustafa ile gāibân ani’l-meclis Emrullah b. İbrahim ve Müslim b. İbrahim nâm kimesneler zimmetlerinde her biri âharın zimmetine lâzım gelen meblağa kefîl ve zâmin olarak hayatında yedinden ve malından bi’l-ma‘iye iktirâz ve kabz eyledikleri beş yüz guruşu mezbûr es-Seyyid Ahmed Ağa kable’l-ahz ve’l-istifâ fevt ve meblağ-ı merkūmun yüz yirmi beş guruşu zevcesi müvekkile-i mezbûreye mevrûs ve üç yüz yetmiş beş guruş cânib-i beytü’l-mâla âid oldukdan sonra tereke-i müteveffâ-yı mezbûr bundan akdemce ma‘rifet-i şer‘le tahrîr ve taksîm olundukda meblağ-ı merkūm beş yüz guruşu müvekkilem zevcem mezbûrenin rub‘ hissesi için ifrâz ve tahsîs kılınmağla meblağ-ı merkūmu mezbûrân Molla Osman ve Molla Mustafa’dan asâlet ve vekâletlerine binâen bi’l-vekâle taleb ederim deyü ba‘de’d-da‘vâ ve’l-inkâr müdde‘î-i vekîl-i mezbûr ber-vech-i meşrûh müdde‘âsını udûlden Hafız Mehmed Ağa b. İbrahim ve Mezbûrân Alemdar Mustafa Ağa ve es-Seyyid Mehmed Ağa nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezkûr beş yüz guruşu müdde‘iye-i müvekkile-i mezbûre Âişe Hatun için vekîl-i mezbûr es-Seyyid Ahmed Ağa’ya asâlet ve kefâletlerine binâen edâ ve teslîme merkūmân Molla Osman ve Molla Mustafa’dan her birine tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 4 S sene 1223.