İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 253 Hüküm no: 220 Orijinal metin no: [28b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimitri’nin Üsküdar’da Çinili Hamam yanındaki kasap dükkânı gediği hissesini Lamber v. Kiryako’ya satması Kasap ferâğı Ma‘rûz Hudâvendigâr-ı esbak cennet-mekân firdevs-âşiyân Gāzi Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde kâin ganem salhânelerinden üçüncü salhâneye merbût medîne-i Üsküdar’da Reis mahallesinde Çinili Hamam kurbünde kâin bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin rub‘ hissesine bâ-temessük-i mütevellî mutasarrıf olan Yorgi v. Dimitri nâm zimmî meclis-i şer‘-i münîrde Hâssa kasabbaşısı izzetlü Osman Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm Lamber v. Kiryako nâm zimmî muvâcehesinde takrîr-i kelâm edip ber-vech-i muharrer gedik âlât-ı lâzımesinden mutasarrıf olduğum rub‘ hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûm Lamber zimmîye ferâğ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm sâlifü’z-zikr âlât-ı lâzıme-i ma‘lûmenin rub‘-ı şâyi‘i mersûm Lamber zimmînin hakk-ı müfevvezi olmuşdur dedikde mersûm Lamber zimmî dahi ba‘de’t-tasdîk rub‘ gedik-i mezkûr fâriğ-i mesfûrun kasr-ı yedinden kendi üzerine defter-i vakf-ı şerîfe ba‘de’l-kayd zabtı için hâmiş-i temessüke tahrîr ve temhîr ve yedine i‘tâsını istid‘â eylediği İstanbul Mahkemesi’nden huzûr-ı [âlîlerine i‘lâm olundu.] Fî 11 S sene 1223.