İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 255 Hüküm no: 223 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul bakkal esnafının Bakkal Tanaş’ın esnaflıktan çıkarılması talepleri Bakkāl esnâfından ihrâc Ma‘rûz Âsitâne-i aliyye ve Bilâd-ı selâse’de vâki‘ bakkālân tâifesinin Pazarbaşısı Süleyman Ağa ve Bölükbaşı es-Seyyid Ahmed ve nizâm ustalarından kabzımâl Yorgaki ve Yazıcı Dimitri ve Fenerli Rizo ve Aksaraylı Anderiko ve Yusufpaşa Çeşmeli Ligori ve Hasanpaşalı Niko ve Müftü Hamamlı Yorgaki ve Çarşambapazarlı Yağmur ve Çakıroğlu Yorgi ve sâirleri meclis-i şer‘-i münîrde İstanbul’da Tahtakale’de vâki‘ bakkāl tâifesinden Tanaş v. Nikola nâm zimmî muvâcehesinde mersûm Tanaş zimmî esnâfımızdan olup lâkin kendi hâlinde ırzıyla mukayyed ve kâr [u] kisbiyle meşgūl olmayıp dâimâ umûr-ı esnâfa müdâhale ve şurût-ı nizâmımızın mugāyiri harekât-ı nâ-marzıyeye ictisâr eylediğinden mâ‘adâ esnâfımızın ba‘zısına nefsâniyet icrâsıyla kendüye tâbi‘ eylediği aveneleriyle tezvîre sülûk birle bi-gayrı hakkın tecrîm ve tekdîrinden hâlî olmayıp ve ol-vechile ihtilâl-i umûrumuzu mûcib hâlâta ibtidâr eylediğine binâen mersûme bi’d-defa‘ât nush u bend eylediğimizde kat‘a mütenassıh olmayıp ızrârında ısrâr etmekle zimmî-yi mersûmdan bir dürlü emn ü rahatımız meslûb olmuşdur deyü muvâcehesinde teşekkî ve esnâf-ı merkūmeden hurûc birle kâr-ı âhara sülûk eylemesini istirhâm ve istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 9 S 1223.