İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 285 Hüküm no: 253 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Tahir’in Çörekçi esnafından Ahmed Usta aleyhindeki alacak davasında anlaşma sağlanması Galata’da çörekçi fırını Ma‘rûz Sâhib-i arzuhâl Mehmed Tâhir b. Mehmed Salih nâm kimesne meclis-i şer‘-i münîrde çörekçi esnâfından derûn-ı arzuhâlde mezkûrü’l-ism Ahmed Usta b. Hasan nâm kimesne muvâcehesinde Âsitâne-i aliyye ve Bilâd-ı selâse’de vâki‘ çörekçi esnâfının kethudâları Ahmed ve Yiğitbaşıları Ahmed Usta ve Yazıcıları Selim Efendi ve Galata ustalarından el-Hâc Hasan ve Ömer ve Mehmed ve Ahmed ve es-Seyyid Ahmed ve Hüseyin ve diğer Hüseyin ve Ali hâzır oldukları hâlde mahrûse-i Galata hâricinde Ağa Câmi‘-i şerîfi kurbünde kâin bir bâb çörekçi fırını derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf-ı şâyi‘i babam müteveffâ-yı mezbûr Mehmed Salih’den mevrûs yedimde mülküm iken ben nısf âlât-ı lâzıme-i muharrere-i mezkûreyi bundan akdemce Kasımpaşa Mahkemesi’nde huzûr-ı hâkimü’ş-şer‘de mezbûr Ahmed Usta’ya üç bin beş yüz guruş semen-i medfû‘ ve makbûza bey‘ ve temlik ve vech-i lâyıkı üzere teslîm etmiş idim. Lâkin mezbûr Ahmed usta beni tağrîr edip ol-vechile bey‘-i mezkûrdan mağbûn olmamla semen olmak üzere medfû‘um olan meblağ-ı merkūm üç bin beş yüz guruşu yedimden ahz birle nısf âlât-ı lâzıme-i muharrere-i mezkûreyi bana teslîme mezbûr Ahmed Usta’ya tenbîh olunmak matlûbumdur deyü tasaddî eylediğim da‘vâmdan bâ-vesâtet-i muslihîn mezbûr Ahmed Usta ile bi’t-tav‘ ve’r-rızâ üç yüz elli guruş bedel-i medfû‘ ve makbûza ba‘de akdi’l-musâlaha ve’l-kabûl bi’l-cümle husûs-ı mezkûra ve mebî‘-i mezkûrun tağrîr ve gabnine ve gedik-i merkūma ve sâir cemî‘ hukūk-ı şer‘iyeye müte‘allika mutlakan âmme-i de‘âvî ve mutâlebât ve kâffe-i eymân ve muhâsamâtdan her birimiz âharın zimmetini şurût-ı müfside ve uhûd-ı mubtıladan ârî cebr ü kerhden hâlî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde mukırr-ı mezbûr Mehmed Tâhir’in bi’l-cümle takrîr-i meşrûhunu mezbûr Ahmed Usta tahkīk ve tasdîk ve ber-vech-i meşrûh kabûlü hâvî ibrâ eylediğini tâyi‘an ve kat‘iyyen ikrâr ü i‘tirâf edip bu vechile külliyen kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 27 min-Saferi’l-hayr sene 1223.