İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 284 Hüküm no: 252 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1223 senesi Mevlid Kandili’nin cami ve mescid minarelerinde kandiller yakılarak halka duyurulması Bâ-sah İstanbul kādısı fazîletlü efendi, İşbu i‘lâmınız mübârek rikâb-ı kamer-tâb-ı cihân-bânîye bâ-takrîr-i âlî-şân arz ve takdîm olundukda manzûr-ı şâhâne buyurulduğunu şâmil bâlâ-yı takrîrimize hatt-ı hümâyûn-ı mülûkâne keşîde buyurulmuş olmağla i‘lâmınız mûcebince leyle-i merkūmede îkād-ı kanâdîl olunmak için lâzım gelenlere tenbîh ve tekîd eyleyesin deyü fî 5 Ra sene 1223. Mevlid-i şerîf sübûtu Dergâh-ı felek-bünyân ve bârgâh-ı âsumân unvânlarına ma‘rûz-ı dâ‘î-i şâkirü’l-ihsânlarıdır ki İşbu sâl-i bâhirü’n-nasr ve’ş-şeref sene-i selâse ve ışrîn ve mi’eteyn ve elf gurre-i şehr-i Rebî‘i’l-evveli hâlâ bi’r-rü’ye sâbite olmayıp gurre-i Saferi’l-hayr yevm-i isneynden mazbût olduğundan tekmîl-i selâsîn ile gurre-i şehr-i Rebî‘i’l-evvel yevm-i erba‘adan mu‘teber olup illet-i gāibe-i tekvîn-i âlem ve dâ‘iye-i uzmâ-yı tevlîd-i benî âdem misbâh-ı bezmgâh-ı vücûd nûr-ı hadaka-i mekârim cûd gurre-i garrâ-yı sipihr ıstafâ, üsve-i enbiyâ-i Muhammedini’l-Mustafâ aleyhi ve alâ âlihî ezka’t-tahâyâ efendimiz hazretlerinin neyr-i tâbnâk vücûd-ı mes‘ûdları ufk-ı sa‘âdetden pertev-endâz-ı mehd-i şühûd ve rûşensâz-ı dîde-i vücûd oldukları şehr-i merkūmun on ikincisi olan leyle-i mübâreke-i ahade müsâdif olmağla bu rahmet-i cesîme-i kâmile ve ni‘met-i celîle-i şâmileye teşekküren minârât ve cevâmi‘ ve mesâcid îkād-ı kanâdîl ile tezyîn ve sürûr-endâz-ı kulûb-ı müminîn kılınmak âdet-i hasene-i Devlet-i aliyye ve kā‘ide-i müstahsene-i saltanat-ı seniyyeden olup bu sünnet-i seniyye-i uzmânın icrâsı zımnında selâtîn-i i‘zâm -âmelühumullâhu bi’l-ihsân ve’l-in‘âm- hazerâtı cevâmi‘-i şerîfleri huddâmına tenbîh olunmak ruhsatını hâvî fermân-ı cihân-mutâ‘ları sudûru iktizâ eylediği atebe-i ulyâlarına i‘lâm olundu. Bâkī emr ü fermân li-hazreti veliyyü’n-ni‘meti ve’l-ihsân. Fi’l-yevmi’s-sâlis min-şehri Rebî‘i’l-evvel li-sene selâse ve ışrîn ve mi’eteyn ve elf. Men lehü’l-izzü ve’s-sa‘âdeti ve’ş-şeref.