İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 304 Hüküm no: 276 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mustafa’nın Fatıma Hatun ve eşi Seyyid Mehmed Odabaşı aleyhindeki alacak davası 202,5 guruş men‘ Ma‘rûz Derviş Mustafa b. Halil nâm kimesne meclis-i şer‘-i münîrde li-ebeveyn kız karındaşı zâtı mu‘arrefe Fatıma Hatun ile hâlâ zevci es-Seyyid Mehmed Odabaşı b. Hüseyin muvâcehelerinde mahrûse-i Galata’ya muzâfe İstinye nâhiyesine tâbi‘ Mîrgünoğlu nâm mahâlde kâin bir bâb kahvehâne derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf-ı şâyi‘i benim ve nısf-ı şâyi‘-i âharı kız karındaşım mezbûre Fatıma Hatun’un yedimizde iştirâken ve şâyi‘an mülk ve hakkımız iken ben ve kızkarındaşım mezbûre mâlikler olduğumuz gedik âlât-ı lâzımesini bundan akdem bin beş yüz guruş semen tesmiyesiyle âhara bey‘ ve semen-i mezkûrun beş yüz iki buçuk guruşunu ben ve beş yüz iki buçuk guruşunu kız karındaşım mezbûre bi’l-münâsafe ahz ü kabz eylediğimizden sonra ben makbûzum olan meblağ-ı merkūm beş yüz iki buçuk guruşu zevcân-ı mezbûrân yedlerinden li-ecli’l-hıfz îdâ‘ ve teslîm etmemle meblağ-ı merkūmun üç yüz guruşunu ahz ü istifâ edip bâkīsi olan iki yüz iki buçuk guruş yedlerinde kalmağla taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb zevcân-ı mezbûrân bi’l-muvâcehe ber-nehc-i şer‘î tahlîf olunmağın mûcebince müdde‘î-i mezbûr Derviş Mustafa da‘vâ-yı mezkûresiyle zevcân-ı mezbûrâna bilâ-beyyine-i âdile mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu.] Fî 6 Ra sene 1223.