İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 305 Hüküm no: 278 Orijinal metin no: [37a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadıoğlu Seyyid Ali Beşe ve ortağı Hasan Beşe’nin kiracıları Yahşioğlu Simon’un oğlu Yorgi kirasını düzenli ödediği takdirde dükkândan çıkarmamaları Davudpaşa İskelesi’nde Keresteci Ma‘rûz Sâhibey-i arzuhâl Kādıoğlu es-Seyyid Ali Beşe b. İbrahim ve müştereki Hasan Beşe b. Mehmed nâm kimesneler Çarşamba günü arz odasında huzûr-ı hazret-i kāimmakām-ı âlî-makāmîde ma‘kūd meclis-i şer‘-i münîrde bundan akdem hâlik olan Yahşioğlu Simyon v. Yoseb nâm zimmînin sulbî kebîr oğlu ve hasran vârisi derûn-ı arzuhâlde mersûmü’l-ism keresteci esnâfından Yorgi zimmî muvâcehesinde esnâf-ı merkūme kethudâsı Mehmed Ağa ve Yiğitbaşısı es-Seyyid Mehmed ve yazıcıları Molla Mustafa ve esnâfından es-Seyyid Ali ve Ahmed ve Mustafa ve Osman ve sâirleri hâzır oldukları hâlde İstanbul’da Davudpaşa İskelesi kurbünde Kasabilyas mahallesinde vâki‘ bir bâb keresteci dükkânı bizim bâ-temessük-i mütevellî bi’l-icâreteyn iştirâken ve şâyi‘an taht-ı tasarrufumuzda olup mersûm Yorgi zimmî dükkân-ı mezkûrda müşâhereten müstecirimiz olmağla târih-i i‘lâm-ı şehrî gāyetinde dükkân-ı mezkûru tahliye ve bize teslîme [37b] mersûm Yorgi zimmîye tenbîh olunmak matlûbumuzdur deyü da‘vâ etdiklerinde ol dahi cevâbında dükkân-ı mezkûrda müşâhereten müstecir olup lâkin derûnunda mevcûde gedik ta‘bîr olunur mu‘teber ve mukayyed âlât-ı lâzıme işbu yedimde olup bin iki yüz üç senesi Recebi’nin yirminci günü târihiyle müverrah bir kıt‘a hüccet-i şer‘iye mantûkunca babam hâlik-i mesfûrun sağlığında ile’l-helâk yedinde müstakıllen mülk ve hakkı olup ba‘de helâkihî gedik âlât-ı lâzımesi hasran bana mevrûs olup ve esnâf-ı hâzırûn-ı merkūmûnun yedlerinde olan bâlâsı tuğrâ-yı garrâ-yı cihân-dârî ile müveşşah bir kıt‘a emr-i âlî nâtık olduğu üzere keresteci dükkânı gedikleri ma‘dûd olup mârrü’z-zikr Davudpaşa İskelesi’nde sekiz aded keresteci dükkânı gediği emr-i mezkûrda muharrer ve esnâf-ı hâzırûn-ı mezbûrûnun şurût-ı nizâmlarında mukayyed ve ber-mûceb-i şurût-ı nizâm mülk sâhibleri kirâ-yı kadîmelerini bilâ-ta‘allül alıp ihrâcımıza tasaddî etmemek nizâm-ı mer‘iyemizden olmağla husûs-ı mezkûr esnâf-ı hâzırûn-ı merkūmûndan istintâk olunup şurût-ı nizâm-ı mezkûr üzere müdde‘iyân-ı mezbûrân kirâ-yı kadîmelerini alıp ihrâcıma tasaddî etmemeleri murâdımdır deyüp husûs-ı mezkûr istikşâf-ı hâl için esnâf-ı hâzırûn-ı merkūmûndan istihbâr olundukda onlar dahi zimmî-yi mersûmu tasdîk ve emr-i mezkûru ibrâz ve müdde‘iyân-ı mezbûrân muvâcehelerinde feth ü kırâet olundukda zikr olunan Davudpaşa İskelesi’nde sekiz aded keresteci dükkânı gediği mastûr ve mukayyed olduğunu müdde‘iyân-ı mezbûrâna tefhîm olundukda onlar dahi mücâb ve mülzem olup ol-vechile mersûm Yorgi zimmî kirâ-yı kadîmini mâh be-mâh mutasarrıfları müdde‘iyân-ı mezbûrâna bilâ-ta‘allül edâ ve teslîm eyledikçe zimmî-yi mersûmun ihrâcına tasaddî etmemek üzere tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 27 S sene 1223.