İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 306 Hüküm no: 279 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazer v. Karabet’in hizmetkârlık bedelinden dolayı Markos aleyhindeki alacak iddiasında bulunmaktan menedilmesi Ecr-i misl men‘i Ma‘rûz Arzuhâl eden Kazer v. Karabet zimmî meclis-i şer‘-i hatîrde derûn-ı arzuhâlde mersûmü’l-ism Markos zimmî muvâcehesinde ben ücret ile hizmet eder makūlesinden olup karındaşım mersûmun talebiyle ücret kavlinsiz medîne-i Üsküdar’a muzâfe Kartal kasabasında vâki‘ bir bâb değirmende bin iki yüz on altı senesi Recebi’l-ferdi gurresine gelince dokuz sene hizmet ve ba‘dehû mufârakat etmemle müddet-i mezkûrede müstahak olduğum ecr-i mislimi karındaşım mersûm Markos zimmîden taleb ederim deyü ba‘de’d-da‘vâ ve’l-istintâk zimmî-yi mersûm dahi cevâbında eğerçi karındaşım müdde‘î-i mersûm Kazer zimmî değirmen-i mezkûrda dokuz sene mütemekkin ve usta olmak üzere hizmet edip lâkin beher sene iktizâ eden ecr-i mislini kendüye tamamen edâ ve teslîm edip hattâ târih-i mezkûrda müfârakat birle benimle bi’l-cümle ahz ü i‘tânın hesâbını rü’yet ve ecr-i mislini tamamen ahz ü kabz eylediğini ikrâr ve ziyâde ecr-i misl mutâlebesine müte‘allika âmme-i da‘vâdan benim zimmetimi mahzar-ı şühûdda kabûlümü hâvî ibrâ ve iskāt etmiş idi deyü sûret-i def‘de eylediği ibrâ müdde‘âsını lede’t-tezkiye makbûlü’ş-şehâde idükleri ihbâr olunan Kurt karyesi İmâmı Mehmed Salih Efendi b. Ahmed ve sâbıkā kasaba-i mezbûre serdârı Abdi Ağa b. Ali nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘î-i mersûm Kazer zimmî da‘vâ-yı mezkûresiyle mesfûr Markos zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 13 Ra sene 1223.