İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 312 Hüküm no: 285 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzcuzade Seyyid Mehmed Ağa’nın vefat eden Ahmed Ağa’da olan alacağının terekesinden tahsil ve yağcı mahzeni gediği rehinin kaldırılması Galata’da yağcı mahzeni gediği fekki Ma‘rûz Mahrûse-i Galata Yağkapanı tüccârından Tuzcuzâde es-Seyyid Mehmed Ağa b. Ahmed nâm kimesne meclis-i şer‘-i münîrde yine kapan-ı mezbûr tüccârından olup bundan akdem vefât eden Ahmed Ağa b. el-hâc Osman’ın verâseti zevce-i menkûha-i metrûkesi Hadice bt. Mehmed nâm hatun ile vâlidesi Âişe Hatun bt. Osman’a ve sulbî sagīr oğulları Osman ve Ömer’e inhisârı tahakkukundan sonra zâtı mu‘arrefe mezbûre Âişe Hatun asâleten ve sagīr-i mezbûrânın min-kıbeli’l-üm ceddeleri ve tesviye-i umûrlarına vasîyy-i mansûbeleri kezâlik zâtı mu‘arrefe Âkıle bt. Hüseyin nâm Hatun vesâyeten muvâcehelerinde mahrûse-i Galata Yağkapanı’nda kâin bir bâb yağcı mahzeni derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mecmû‘u müteveffâ-yı mezbûr Ahmed Ağa’nın yedinde mülkü iken sene-i sâbıkā Zilhiccesi gurresinde hayatında gedik-i mezkûrun nısf-ı şâyi‘ini yedinde ibkā ve nısf-ı şâyi‘-i âharını zikri âtî idâne edeceğim meblağ mukābelesinde yedimde irhân ve vech-i lâyıkı üzere teslîm eylediğinde ben dahi irtihân ve tesellüm ve kabûl edip mâlımdan beş yüz otuz beş guruş ikrâz ve teslîm, ol dahi iktirâz ve kabz edip kable’l-edâ ve’l-îfâ mezbûr Ahmed Ağa fevt ve terekesi veresesi mezbûretân Âişe ve Hadice hatunlar ile vasîyy-i mezbûre Âkıle Hatun ahz ü kabz ve vaz‘-ı yed etmeleriyle meblağ-ı merkūmu tereke-i müteveffâ-yı mezbûrdan edâ birle rihân-ı mezkûreyi rehniyetden fek ve tahlîse mezbûretân Âişe ve Âkıle hatunlara tenbîh olunmak matlûbumdur deyü ba‘de’d-da‘vâ ve’l-inkâr müdde‘î-i mezbûr es-Seyyid Mehmed Ağa ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan kapan-ı mezbûr nâzırı el-Hâc Ali Ağa b. Hüseyin ve Mehmed Ağa b. İsmail nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât ve’l-half mûcebince meblağ-ı merkūm beş yüz otuz beş guruş tereke-i müteveffâ-yı mezbûrdan müdde‘î-i merkūm es-Seyyid Mehmed Ağa’ya edâ ve teslîm ve rihân-ı mezkûreyi rehniyetden fek ve tahlîs olunmak iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 25 S sene 1223