İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 311 Hüküm no: 284 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katerina bt. Sava’nın İsmail Ağa’dan almış olduğu borcunu ödeyerek bey’ bi’l-vefâ suretiyle sattığı evini geri alması Menzil mâddesi mazbatadan ihrâç, Ma‘rûz Sâhibe-i arzuhâl şahsı mu‘arrefe Katerina bt. Sava nâm Nasrâniye meclis-i şer‘-i hatîrde derûn-ı arzuhâlde mezkûrü’l-ism İsmail Ağa b. Hüseyin nâm kimesne muvâcehesinde nezâret-i dâ‘îlerinde âsûde evkāfdan Hacce Mihrişah Hatun Vakfı mütevelliyesi zâtı mu‘arrefe Şerife Fatıma Hanım hâzıra olduğu hâlde vakf-ı mezbûr musakkafâtından Mihrişah Hatun mahallesinde vâki‘ beher şehr otuz akçe icâre-i müecceleli ma‘lûmü’l-hudûd bir bâb menzil benim bi’l-icâreteyn taht-ı tasarrufumda iken ben menzil-i mezkûru mezbûr [38b] İsmail Ağa’dan iktirâz ve kabz eylediğim beş yüz elli guruş zimmetimde deynim mukābelesinde her ne zaman edâ-yı deyn eder isem redd-i ferâğ etmek şartıyla bâ-re’y-i mütevellî bin iki yüz yedi senesi Zilhiccesi gurresinde mezbûr İsmail Ağa’ya vefâen fâriğa olduğumdan sonra işbu târihe gelince meblağ-ı merkūm için on beş sene müddetde bilâ-devr murâbaha nâmıyla malımdan cem‘an bin beş yüz guruşumu mezbûr İsmail Ağa ahz ü kabz etmekle makbûzu olan meblağ-ı merkūmun beş yüz elli guruş deyn-i mezkûruma takasan fürû-nihâde ve tenzîl olunup bâkīsi olan dokuz yüz elli guruşu bana edâya ve menzil-i mezkûru bâ-re’y-i mütevellî red ve ferâğa mezbûr İsmail Ağa’ya tenbîh olunmak murâdımdır deyü da‘vâ etdikde ol dahi cevâbında menzil-i mezkûru müdde‘iye-i mersûme Katerina Nasrâniye târih-i mezbûrda bâ-re’y-i mütevellî ferâğ-ı kat‘î-i mu‘teber ile fâriğa olup ben dahi menzil-i mezkûru ba‘de’t-tahliye beher şehr yedişer guruş otuzar para icâre tesmiyesiyle mersûme Katerina Nasrâniyeye îcâr ve teslîm ol dahi istîcâr ve kabûl ve icâre-i mezkûreden şehr-i sâbık Saferi’l-hayrı gāyetine gelince yüz seksen üç ayda mersûmenin zimmetinde müctemi‘ bin dört yüz otuz sekiz guruş on para alacak hakkım olmağla meblağ-ı merkūmu Nasrâniye-i mersûmeden taleb ederim deyüp ber-vech-i muharrer müdde‘iye-i mersûmenin vefâ müdde‘âsını ve ol-mikdâr guruş bilâ-devr murâbaha ahzını inkâr etmekle müdde‘iye-i mersûme ber-minvâl-i muharrer menzil-i mezkûru mezbûr İsmail Ağa’ya şart-ı müfsid ile fâriğa olduğunu makbûlü’ş-şehâde idükleri ihbâr olunan es-Seyyid Mehmed Efendi b. Feyzullah ve es-Seyyid Abdullah b. Derviş Ahmed şehâdetleriyle bi’l-muvâcehe ber-nehc-i şer‘î isbât etmeğin mûcebince menzil-i mezkûr şart-ı müfsid ile olduğuna binâen meblağ-ı merkūm beş yüz elli guruşu mezbûr İsmail Ağa’ya edâ birle menzil-i mezkûru bâ-re’y-i mütevellî Nasrâniye-i mersûmeye red ve ferâğ olunmak iktizâ edip lâkin tarafeyn iddi‘â eyledikleri mebâliğ-i mezkûreyi şâhide havâle olunup bir dahi meclis-i şer‘a gelmemeleriyle henüz da‘vâlarına faysal verilmediği vekāyi‘ kâtibimiz cerîdesinde mazbût olmağın imtisâlen li’l-emri’l-âlî sûret-i zabtı ihrâc ve İstanbul Mahkemesi’nden huzûr-ı [âlîlerine i‘lâm olundu.] Fî 15 Ra sene 1223.