İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 314 Hüküm no: 287 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Mehmed Ağa’nın kasap dükkânı gediği hissesini Kasap Kosta’ya satması Kādı karyesinde kasab Ma‘rûz Hudâvendigâr-ı esbak cennet-mekân firdevs-âşiyân merhûm Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden altıncı salhâneye merbût medîne-i Üsküdar’a muzâfe Kādı karyesinde vâki‘ Çörekçi fırını karşısında ekmekçi ve bakkāl dükkânları beynlerinde kâin bir bâb kasab dükkânı gediğinin rub‘ hisse-i şâyi‘asına bâ-temessük-i mütevellî mutasarrıf olan Hafız Mehmed Ağa b. Mustafa meclis-i şer‘-i enverde Hâssa Kasabbaşısı Mustafa Ağa tarafından mürsel kasablar kethudâsı Süleyman Ağa ve sâir kasab ustaları hâzır oldukları hâlde gedik-i mezkûrun üç rub‘ hisse-i şâyi‘asına bâ-temessük-i mütevellî mutasarrıf olan bâ‘isü’l-i‘lâm Kasab Kosta v. Hıristo zimmî muvâcehesinde takrîr-i kelâm edip ben bâlâda mezkûr bâ-temessük-i mütevellî taht-ı tasarrufumda olan rub‘ hisse-i mezkûremi kendi hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûm Kosta zimmîye bedel-i ma‘lûm ve makbûz mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl edip fîmâ-ba‘d sâlifü’z-zikr rub‘ gedik-i mezkûrda benim aslâ ve kat‘a alâka ve medhalim kalmayıp mecmû‘u gedik-i mezkûr mersûm Kosta zimmînin dâhil-i havza-i tasarrufu olmuşdur [39a] dediğini zimmî-yi mersûm ba‘de’t-tasdîk rub‘ gedik-i mezkûr fâriğ-i mezbûr Hafız Mehmed Ağa ferâğından mersûm Kosta zimmî üzerine tahrîr ve temhîr ve defter-i vakf-ı şerîfe kayd olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 15 Rebî‘ülevvel sene 1223.