İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 314 Hüküm no: 288 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Eğinli Kasap Seyyid İsmail Ağa’nın Etmeydanlıoğlu Mehmed Ağa’ya olan borcundan dolayı kasap dükkânı gediğinin Hafız Mehmed’e satılarak borcunun ödenmesi Kasab gediklerine dâir Ma‘rûz Sâdır olan fermân-ı âlîlerine imtisâlen Hâssa Kasabbaşısı izzetlü Osman Ağa tarafından mürsel vekîli kasablar kethudâsı Süleyman Ağa b. el-Hâc Ömer ile Kasab ustalarından Hafız el-Hâc Mehmed Emin ve el-Hâc Osman ve es-Seyyid Ahmed ve el-Hâc Mehmed ve es-Seyyid İbrahim ve Mustafa Alemdar ve Molla Mehmed ve bi’l-cümle Kasab ustaları meclis-i şer‘-i münîrde her biri takrîr-i kelâm edip Âsitâne-i aliyye ve tevâbi‘inde kâin kasab dükkânlarında olan kasab âlâtı gedik i‘tibâr olunup Âsitâne-i aliyyeye ganem getüren celeb tâifesinin mâllarını salhânelerde zebh ve kasab dükkânlarının merbût olduğu salhâneden kasablara lahm-ı ganem verilip gedik mutasarrıflarından biri müflisen firâr veyâhûd bilâ-veled-i zükûr fevt oldukda celeb tâifesine deyni zuhûr eder ise mutasarrıf olduğu gedikleri mâl-ı celebe bedel olup yeniçeri ağası ve sekbânbaşı ve kasabbaşı ve cümle kasab ustaları ma‘rifetiyle ve ma‘rifet-i şer‘le âhara tefvîz ve kasab dükkânları merbût olduğu salhâne vakfının mütevellîsi tarafından ancak gedik için birer temessük alına gelip ve bedel nâmıyla ahz olunan meblağdan celeb tâifesine deyni edâ olunmak üzere celeb tâifesinin mâlları zâyi‘ olmamak için işbu hâmiş-i arzuhâlde mastûr derkenâr olunan emr-i âlî mantûkunca şurût-ı nizâm-ı mer‘iyemizden olduğuna binâen Hudâvendigâr-ı esbak cennet-mekân firdevs-âşiyân Gāzi Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde kâin ganem salhânelerinden altıncı salhâneye merbût medîne-i Üsküdar’a muzâfe Kadı karyesinde vâki‘ Çörekçi fırını karşısında etmekçi ve bakkāl dükkânları beynlerinde kâin bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin dört sehm i‘tibârıyla bir sehm hisse-i şâyi‘asına bâ-temessük-i mütevellî mutasarrıf olan Eğinli es-Seyyid İsmail Ağa b. es-Seyyid Ahmed nâm kimesnenin işbu hâzır bi’l-meclis kasab ustalarından sâhib-i arzuhâl Etmeydanlıoğlu Mehmed Ağa b. İsmail nâm kimesneye lahm-ı ganem semeninden bin guruş deyni olduğu hâlde işbu târihden sekiz sene mukaddem mezbûr es-Seyyid İsmail firâr ve gaybet ile mefkūd ve mezbûr Mehmed Ağa’nın dahi celeb tâifesine külliyetli deyni olmağla bâlâda mezkûr mutasarrıf olduğu rub‘ gediği ber-mûceb-i şurût-ı nizâm mezbûr Mehmed Ağa’ya olan deynine mukābele olduğu emr-i âlî-şân-ı mezkûrdan müstefâd olup ol-vechile firârî-i mezbûrun gedik-i mezkûrda olan rub‘ hisse-i şâyi‘asının bey‘i muktezî olduğuna binâen ber-vech-i meşrûh bey‘e kıbel-i şer‘den vasî ve kayyım nasb olunan kethudâ-yı mezbûr Süleyman Ağa meclis-i şer‘-i münîrde kasab ustalığını idâreye kādir idüğü ihbâr olunan işbu bâ‘isü’l-i‘lâm Hafız Mehmed Ağa b. Mustafa mahzarında bi’l-vesâye takrîr-i kelâm edip gāib-i mezbûrun ber-vech-i muharrer mutasarrıf olduğu sâlifü’z-zikr kasab dükkânı derûnunda mevcûde gedik âlât-ı lâzıme-i ma‘lûmeden rub‘ hisse-i şâyi‘asını ber-mûceb-i şurût-ı nizâm merkūm Mehmed Ağa’ya deyni olan meblağ-ı merkūm bin guruş edâ olunmak için el-yevm bedel-i mislinden ezyed ve evfer olduğu ihbâr olunan bin guruş bedel-i medfû‘ ve makbûza mezbûr Hafız Mehmed Ağa’ya bâ-ma‘rifet-i mütevellî bi’l-vesâye ferâğ ve tefvîz, ol dahi tefevvüz ve kabûl ve bedel-i mezkûr bin guruşu gāib-i mezbûrun dâyini hâzır-ı merkūm Mehmed Ağa’ya tamamen edâ ve teslîm, ol dahi ahz ü kabz edip fîmâ-ba‘d sâlifü’l-beyân gedik ta‘bîr olunan âlât-ı lâzıme-i muharrere-i mezkûrenin rub‘-ı şâyi‘inde gāib-i mezbûr es-Seyyid İsmail’in aslâ ve kat‘a alâka ve medhali kalmayıp merkūm Hafız Mehmed Ağa’nın dâhil-i havza-i tasarrufu olmuşdur deyü ba‘de’l-ikrâr ve’t-tasdîk rub‘ gedik-i mezkûr gāib-i mezbûr üzerinden merkūm Hafız Mehmed Ağa üzerine tahrîr ve temhîr ve defter-i vakf-ı şerîfe ba‘de’l-kayd zabt ve tasarrufu için müceddeden yedine temessük i‘tâsı iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 11 S sene 1223.