İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 322 Hüküm no: 296 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yuvan’ın hizmetkârlık yaptığı Petro v. Yordan aleyhindeki alacak davasında anlaşma sağlanması 400 guruşa sulh Ma‘rûz Arzuhâl eden Nikola v. Yuvan nâm zimmî meclis-i şer‘-i münîrde derûn-ı arzuhâlde mersûmü’l-ism Petro v. Yordan nâm zimmî muvâcehesinde ben ücret ile hizmet eder makūlesinden olup mersûmun talebiyle ücret kavlinsiz işbu târihe gelince kendüye yedi sene hizmet ve hâlâ mufârakat etmemle müddet-i mezkûrede müstahık olduğum ecr-i mislimi mersûm Petro zimmîden taleb ederim deyü tasaddî eylediğim da‘vâmdan bâ-vesâtet-i muslihîn mesfûr Petro zimmî ile bi’t-tav‘ ve’r-rızâ dört yüz guruş bedel-i medfû‘ ve makbûza ba‘de akdi’l-musâlaha ve’l-kabûl bi’l-cümle husûs-ı mezkûra ve ziyâde ecr-i misl mütâlebesine ve işbu târih-i i‘lâma gelince sâir cemî‘ hukūk-ı şer‘iyeye müte‘allika mutlakan âmme-i de‘âvî ve kâffe-i mutâlebâtdan mersûm Petro zimmînin zimmetini şurût-ı müfsideden ârî ve uhûd-ı mubtıladan berî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt eylediğimde ol dahi ibrâ-yı mezkûrumu kabûl edip bu vechile külliyen kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 27 Ra sene 1223.