İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 321 Hüküm no: 295 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa Allâme Efendi ile kardeşleri Ayşe ve Fatıma hanımların kiracıları Davit ve Aron aleyhindeki alacak iddialarında anlaşma sağlanması Ortaköy’de bakar salhânesi Ma‘rûz Ashâb-ı arzuhâl hâcegân-ı Dîvân-ı hümâyûndan ve Mektûbî-i Sadr-ı âlî hulefâsından el-Hâc Mustafa Allâme Efendi b. el-merhûm Telhîsî Mehmed Ağa kendi nefsinden asâleten ve hemşîreleri Âişe Hanım ve Fatıma Hanım taraflarından husûs-ı âti’l-beyânda vekîl olduğu zatlarını ârifân el-Hâc İsmail Ağa b. Halil ve Mustafa Ağa b. Osman nâm kimesneler şehâdetleriyle sâbit olmağla vekâleten meclis-i şer‘-i münîrde Haremeyn-i şerîfeyn Müfettişi müderrisîn-i kirâm-ı zevi’l-ihtirâmdan fazîletlü Mehmed Fikri Efendi tarafından mürsel Kâtib es-Seyyid Hüseyin Efendi hâzır olduğu hâlde derûn-ı arzuhâlde mersûmü’l-ism sığır kasabı Davit ve şerîki karındaşı Aron veledey Mosi nâm Yahûdîler muvâcehelerinde Dârü’s-sa‘âdeti’ş-şerîfe Ağası nezâretlerinde âsûde evkāfdan mahrûse-i Galata’ya muzâfe Kasaba-i Beşiktaş’a tâbi‘ Ortaköy’de vâki‘ merhûm Mehmed Kethudâ nâm sâhibü’l-hayrın binâ ve ihyâ eylediği câmi‘-i şerîfi musakkafâtından karye-i merkūmede kâin ma‘lûmü’l-hudûd bir bâb Yahûd tâifesine mahsûs bakar salhânesinin nısf-ı şâyi‘i benimle müvekkillerim kız karındaşlarım mezbûretânın bâ-temessük-i mütevellî bi’l-icâreteyn iştirâken ve şâyi‘an taht-ı tasarrufumuzda olup Yahûdiyân-ı mersûmân derûnlarında senevî yüz altmış guruş kirâ ile müşâhereten müstecirimiz olmağla icâre-i mezkûreden bin iki yüz on senesi Rûz-ı Kasım ibtidâsından iki yüz yirmi senesi Şubatı gāyetine gelince on bir senede müctemi‘ olan bin yedi yüz altmış guruş mersûmân Davit ve Aron Yahûdilerden bi’l-asâle ve bi’l-vekâle taleb ederim deyü tasaddî eylediğim da‘vâmdan bâ-vesâtet-i muslihîn mersûmân ile bi’t-tav‘ ve’r-rızâ yedi yüz guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâ bin altmış guruşa müte‘allika da‘vâdan mersûmân Davit ve Aron Yahûdîlerin zimmetlerini ibrâ-yı âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eylediğimde onlar dahi ibrâ-yı mezkûrumu kabûl edip bu vechile kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 21 Ra sene 1223.