İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 324 Hüküm no: 300 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolapçı olarak bilinen ipek bükücü esnaflığından çıkarılan eski Kethuda Mehmed Said ve Yiğitbaşı Ahmed’in tekrar esnaflığa alınmaları İşbu i‘lâm kaydında sehiv vâki‘ olmağla darb olunup sahîhi sahîfe mukābilinde kayd olunmağın işbu şerh verildi. (Mühür) < << Âsitâne-i aliyye’de vâki‘ Dolapçı ta‘bîr olunur harîr bükücü esnâfının kethudâsı Mustafa Ağa ve yiğitbaşısı Hüseyin Usta ve müsinn ü ihtiyârlarından es-Seyyid Ahmed ve Mehmed Emin ve diğer es-Seyyid Ahmed ve Hüseyin ve el-Hâc Mustafa ve Mahmud ve es-Seyyid Numan ve el-Hâc İsmail ve Süleyman ve es-Seyyid Cafer ve es-Seyyid Mehmed Ârif ve diğer Hüseyin ve Ali ve Ahmed Nuri ve diğer Mehmed ve Ahmed ve es-Seyyid İbrahim ve es-Seyyid Mehmed ve İbrahim ve Halil ve Yusuf ve Hafız Süleyman ve es-Seyyid Osman ve âhar Hüseyin ve diğer Süleyman ve Mustafa ve sâir bi’l-cümle dolapçı esnâfı meclis-i şer‘-i münîrde esnâf-ı mezbûrenin sâbıkā kethudâsı Mehmed Said ve yiğitbaşısı Ahmed nâm kimesneler muvâcehelerinde merkūmân mukaddemâ esnâfımızın kethudâ ve yiğitbaşısı olup bundan akdem ba‘zı cünhaları sebebiyle san‘atımızdan bâ-i‘lâm tard ve ihrâc etdirmiş idik. El-hâletü hâzihî beynimiz tevfîk ve ıslah olunup yedimizde olan i‘lâm-ı mezkûru rızâmızla merkūmâna teslîm ve yine içimize idhâl ve ke’l-evvel başımız ile beraber ustamız olup san‘at-ı mezkûrede ilâ-mâşâallâhu te‘âlâ ta‘ayyüş edip bizler umûr ve husûslarına kat‘a müdâhale ve ta‘arruz etmeyiz deyüp bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu.>> <>