İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 324 Hüküm no: 301 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Servi Mustafa Ağa’nın Irgadpazarı yakınlarında bulunan Çörekçi fırını dükkânı gediğinin kaleminden kaydının silinmesi Irgadpazarı’nda çörekçi fırını Ma‘rûz Servi Mustafa Ağa b. Mehmed nâm kimesne tarafından husûs-ı âtîde vekîl olduğu İbrahim Ağa b. Hüseyin ve Mustafa Ağa b. Osman nâm kimesneler şehâdetleriyle sâbit olan es-Seyyid Ali Ağa b. Ömer nâm kimesne meclis-i şer‘-i münîrde Âsitâne-i aliyye ve Bilâd-ı selâse’de vâki‘ çörekçi esnâfının kethudâsı Ahmed Ağa ve yiğitbaşıları Ahmed Usta ve yazıcıları Molla Selim ve müsinn ü ihtiyârlarından el-Hâc Mehmed Usta ve Mustafa usta ve Hüseyin Usta ve Ahmed Usta ve İslâm Usta ve Ali Usta ve Mehmed Usta ve Hasan Usta ve sâir bi’l-cümle ustaları hâzır oldukları hâlde bi’l-vekâle takrîr-i kelâm edip İstanbul’da Irgadpazarı kurbünde İplikçi Hanı ittisâlinde kâin bir bâb çörekçi fırını müvekkilim mezbûrun bi’l-icâreteyn taht-ı tasarrufunda ve Başmuhâsebe’de mukayyed ve mu‘teber gedik ta‘bîr olunur âlât-ı lâzıme-i ma‘lûmesi dahi bâ-hüccet-i şer‘iye müstakıllen yedinde mülkü olup lâkin müvekkilim mezbûr fırın-ı mezkûru akār-ı âhara tebdîl murâd etmekle gedik-i mezkûre fîmâ-ba‘d amel ve i‘tibâr olunmamak şartıyla kaleminden kaydı ref‘ ü terkīn ve yedine sûret i‘tâ olunması müvekkilim mezbûrun matlûbudur dedikde istikşâf-ı hâl için esnâf-ı hâzırûn-ı merkūmûn istintâk olundukda onlar dahi cevâblarında, gedik-i mezkûr âhar mahalle nakl olunmayıp ve kaleminden kaydı terkīn ve sûret i‘tâ olunmasına bizler dahi râzılarız dediklerinde gedik-i mezkûrun kaydı ref‘ ü terkīn ve ağa-yı mezbûr yedine sûret i‘tâ olunması İstanbul Mahkemesi’nden huzûr-ı [âlîlerine i‘lâm olundu.] Fî-gurreti Rebî‘ülâhir sene [1223]