İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 332 Hüküm no: 309 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa Tekkesi’ne fukaraya verilen fodulanın önceki gibi beş adet ve her birinin seksen kıyye olması Rumeli Kādıaskeri huzûrunda ma‘iyeten Koca Mustafa Paşa Tekyesi’nin fodula nizâ‘ı Ma‘rûz İslâmbol’da Şehremîni kurbünde vâki‘ tarîk-i Halvetiyye tekyelerinden Nazmi Efendi Tekyesi’nde hâlâ post-nişîni olup kıbel-i şer‘den zikri âtî husûsda husûmeti re’y olunan sâhib-i arzuhâl el-Hâc Sırrı Efendizâde es-Seyyid eş-Şeyh Abdülkerim Efendi bi’l-ma‘iye rü’yete memûr hâlâ İstanbul kādısı fazîletlü Dürrîzâde Mehmed Hidayetullah Efendi hazretleri taraflarından mürsel Kâtib Merhabâzâde Mahmud Efendi hâzır olduğu hâlde du‘âhânemizde ma‘kūd meclis-i şer‘-i enverde İstanbul kādıları fazîletlü efendiler hazerâtı nezâretlerinde âsûde evkāfdan merhûm Koca Mustafa Paşa Vakfı’nın hâlâ mütevellîsi olan derûn-ı arzuhâlde mezkûrü’l-ism el-hâc Hüseyin Ağa b. Ömer tarafından husûs-ı âtîde vekîl-i müseccel-i şer‘îsi olan Mehmed Said Efendi b. Feyzullah mahzarında vakf-ı mezkûrun nâzırı olup hâlâ Koca Mustafa Paşa Tekyesi’nde seccâde-nişîn-i irşâd olan umdetü’s-sâlikîn es-Seyyid Mehmed Haşim Efendi ile tekye-i mezkûre imâretinin aşçısı olan Hasan Ağa b. Hüseyin hâzır oldukları hâlde imâret-i mezkûreden post-nişîn olduğum zikr olunan Nazmi Efendi Tekyesinde olan fukarâya it‘âm olunmak üzere yüz seneden mütecâviz müddetden beri beher yevm verilegelen beş çift fodulanın sâir imâret-i mezkûreden ashâb-ı ta‘yînâta verilegeldiği vech üzere her adedi? seksen dirhem iken bu esnâda amel-i kadîme mugāyir tekye-i mezbûreye merbût zikr olunan beher yevm beş çift fodulanın her bir çiftini müvekkil-i mütevellî-i merkūm ve nâzır-ı Şeyh-i merkūm ve aşçı-yı mezbûrdan her biri bi’l-ittifâk otuz altı dirheme tenzîl etmeleriyle hakīkat-i hâl bî-garaz ehl-i vukūfdan isihbâr olunup kadîmî olageldiği vech üzere sâlifü’z-zikr beher yevm çift fodulanın her adedi seksen dirheme iblâğ olunmak üzere mütevellî vekîli merkūm Mehmed Said Efendi ile nâzır-ı şeyh-i mezbûr ve hâzır-ı merkūm Aşçı Hasan Ağa’dan her birine tenbîh olunması murâdımdır deyü işbu arzı ile istirhâm etdikde fi’l-hakīka merkūm Abdülkerim Efendi’nin yedinde olup mu‘âyene olunan fodula ancak on altı dirhem olduğu zâhir olduğundan istintâk [42a] olunduklarında vekîl-i merkūm Mehmed Said Efendi ile hâzır-ı merkūm Aşçı Hasan Ağa cevâblarında sâir ashâb-ı ta‘yînâta verilen fodulanın beher adedi seksen dirhem olduğunu i‘tirâf edip lâkin müdde‘î-i merkūm eş-Şeyh Abdülkerim Efendi’nin post-nişîni olduğu tekye-i merkūmeye verilen beşer çift fodula mukaddemâ bir çift olup ba‘dehû beş çifte iblâğ olunduğundan beher adedinin dirhemi on sekizer dirheme tenzîl olunduğu mesmû‘umuz olup sâlifü’z-zikr beher yevm beşer çift fodulanın beher adedini kadîmden berü seksen dirhem olduğu ma‘lûmumuz değildir deyü amel-i kadîmi inkâr etdiklerinde fi’l-hakīka hâl müdde‘î es-Seyyid eş-Şeyh Abdülkerim Efendi’nin bâlâda bast ü beyân eylediği minvâl üzere olduğu vukūf-ı tammı olan bî-garaz Müslimînden eş-Şeyh Ebûbekir Efendi b. Ali ve Hatib Ali Efendi b. Ömer ve es-Seyyid Halil Fahreddin Efendi b. es-Seyyid İbrahim ve es-Seyyid Ahmed Efendi b. Süleyman ve diğer es-Seyyid Ahmed Efendi b. el-Hâc Ali ve Molla Hasan b. Mehmed nâm kimesnelerin bi’l-muvâcehe alâ-tarîki’ş-şehâde ihbârlarıyla zâhir ve mütehakkık olmağın bu sûretde amel-i kadîme binâen sâlifü’l-beyân beher yevm beş çift fodulanın beher adedi seksen dirhem olmak üzere i‘mâli ve sâir ashâb-ı ta‘yînât misillü müdde‘î-i merkūm es-Seyyid eş-Şeyh Abdülkerim Efendi’nin Tekyesi’nde fukarâya it‘âm-ı ta‘âm olunmak için imâret-i merkūmeden i‘tâ olunmak iktizâ eylediği huzûr-ı âlîlerine i‘lâm olundu. Fî 2 Rebî‘ülâhir sene 1223.