İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 331 Hüküm no: 308 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berhamiye v. Salamon’un Şerife Hatice aleyhindeki alacak iddiasını ispat edemediğinden davadan menedilmesi 348,5 guruş men‘ Ma‘rûz Âsitâne-i aliyye’de Evliyâhanı’nda mütemekkin Yahûd tâifesinden Berhamiye v. Salamon meclis-i şer‘-i münîrde Şerife Hadice bt. İbrahim muvâcehesinde işbu Hadice Hatun yedinden iştirâ ve kabz eylediği zirâ‘ ve fiyâtı beynimizde ma‘lûm cit semeninden üç yüz kırk sekiz buçuk guruş alacak hakkım olmağla hâlâ taleb ederim deyü ba‘de’d-da‘vâ ve’l-istintâk mezbûre Hadice Hatun cevâbında mârrü’z-zikr müdde‘âsı olan eşyâdan bir şey iştirâ etmedim deyü mesfûrun müdde‘âsını bi’l-külliye ba‘de’l-inkâr müdde‘î-i mersûm Berhamiye’den müdde‘âsına mutâbık beyyine taleb olundukda ikāmet-i beyyineden izhâr-ı acz edip mezbûre Hadice Hatun’u dahi tahlîfe tâlib olmamağla mersûm Yahûdî Berhamiye mezbûre Hadice Hatun’a bilâ-beyyine-i âdile mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 3 Ra sene 1223.