İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 333 Hüküm no: 311 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Rıfat’ın vasisi Ümmügülsüm bt. Ahmed’in manav dükkânına tütüncü dükkânı gediğini nakletme talebinin kabul olunmadığı Mana ve tütüncü gediği olmamağa tenbîh Ma‘rûz İstanbul’da Aksaray kurbünde sâkine Ümmügülsüm bt. Ahmed nâm Hatun meclis-i şer‘-i münîrde tütüncüler kethudâsı İbrahim Ağa ve Yiğitbaşı es-Seyyid Abdullah ve esnâfından Şehremînli Mustafa Efendi ve es-Seyyid el-Hâc Molla ve es-Seyyid Mustafa Ağa ve Uzunhacı İbrahim Ağa ve Galatalı Mustafa Ağa ve es-Seyyid Hasan Ağa ve sâirleri muvâcehelerinde mahrûse-i Galata’da Balıkpazarı kapısı hâricinde kapı ittisâlinde vâki‘ bir bâb manav dükkânı vasîsi olduğum sadrî oğlum işbu hâzır bi’l-meclis Mehmed Rıfat nâm sagīrin babasından müntakil bi’l-icâreteyn bâ-temessük-i mütevellî taht-ı tasarrufunda olup lâkin bu esnâda tütüncü esnâfından ba‘zı kimesneler gediğini benim iznimle dükkân-ı mezkûre nakl murâd eylediğinde esnâf-ı mezbûrûn mümâna‘at etmeleriyle men‘ ü def‘ olunmak bi’l-vesâye matlûbumdur deyü ba‘de’d-da‘vâ ve’l-istintâk onlar dahi cevâblarında işbu yedimizde olan fermân-ı âlî-şânda nakl-i gedik husûsu kethudâ ve yiğitbaşı ve on nefer nizâm ustaları ma‘rifetiyle olmadıkça tütüncü gediği bir mahâlden bir mahalle nakl olunması memnû‘âtdan olduğu şurût-ı nizâm-ı mer‘iyemizden olup ve işbu dükkân mâ-tekaddümden beri manav dükkânı olmağla bir vechile âhar mahâlden dükkân-ı mezkûre gedik nakline râzı değiliz deyüp emr-i âlî-şân-ı mezkûru ibrâz ile meclis-i şer‘de feth ü kırâet olundukda fi’l-vâki‘ gedik nakli husûsu kethudâ ve yiğitbaşı ve on nefer nizâm ustaları ma‘rifetleriyle ve izinleri olmadıkça bir vechile bir mahâlden bir mahalle nakl olunmasın deyü tasrîh olunduğu vasîyy-i müdde‘iye-i mezbûreye tefhîm ve dükkân-ı mezkûr kemâ-kân manav dükkânlığında ibkā ve tütüncü olmamak üzere tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 27 Rebî‘ülevvel sene 1223.