İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 338 Hüküm no: 318 Orijinal metin no: [42b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mellah taifesinden Ali Beşe, Durmuş Beşe ve Emin Beşe’nin Kaptan Hacı Mustafa Ağa’dan ücret talebinden men olunmaları Mellâh ücreti nizâ‘ı Ma‘rûz Mellâh tâifesinden Ali Beşe b. İbrahim ve Durmuş Beşe b. Ahmed ve Emin Beşe b. Ahmed nâm kimesneler meclis-i şer‘-i münîrde Kapan tüccârından ve ashâb-ı sefâinden el-Hâc Mustafa Ağa b. Mehmed nâm kimesne mahzarında bi’l-cümle kapan tüccârı ve ashâb-ı sefâin hâzır oldukları hâlde biz mezbûrun sefînesinde mellâh olup Bahr-ı sefîd cânibinde Foçalar nâm iskelelerden merkūmun sefînesine tuz tahmîl ve iskele-i merkūmeden iftirâkımız esnâsında İngiliz keferesi sefîneleri zuhûr edip biz dahi üç ay iskele-i mezbûrede meks ve ikāmet ve ba‘dehû her birimiz sefîne-i mezkûreden çıkıp mahâll-i âhara azîmet eylediğimizden sonra sefîne-i merkūme âhar mellâh ile [43a] Âsitâne-i aliyye’ye vürûd etmekle müddet-i mezkûrede müstahık olduğumuz ecr-i mislimizi mezbûr el-Hâc Mustafa Ağa’dan taleb ederiz deyü ba‘de’d-da‘vâ ve’l-istintâk mezbûr el-Hâc Mustafa Ağa cevâbında eğerçi müdde‘iyûn-ı mezbûrûn sefîne-i mezkûrede üç ay meks edip lâkin tekmîl-i maslahat etmeksizin her biri firâr etmeleriyle sefîne-i mezkûreye âhar mellâh girmekle işbu yedimizde olup bin iki yüz on yedi senesi evâil-i Şa‘bâni’l-mu‘azzamı târihiyle müverrah bâlâsı tuğrâ-yı garrâ-yı cihân-dârî ile müveşşah bir kıt‘a fermân-ı âlî-şân mantûkunca öteden beri beynimizde mer‘î şurût-ı nizâmımız üzere Âsitâne-i aliyye’de sâkin ibâdullâhın akvât-ı yevmiyeleri için ecnâs zehâiri mahâllinde celb ve sefînelerimize tahmîl ile Dersaâdet’e ba‘de’l-îsâl hâsıl olan fâidenin üç sehm i‘tibârıyla bir sehmi sâhib-i sermâyeye ve bir sehmi sâhib-i sefîneye ve bir sehmi mellâhîn tâifesine taksîm olagelip bu sûretde sefîne-i mezkûre Âsitâne-i aliyye’ye vürûd ve içinde bulunan mellâhlar her biri hissesini ahz ü kabz etmeleriyle mellâhîn tâifesi bizlerden ücret talebi vukū‘ bulmuş değildir deyü tüccâr-ı hâzırûn-ı merkūmûnun tasdîkleriyle ibrâz eylediği emr-i âlî-şân-ı mezkûrun mazmûnu ve kaziyye minvâl-i meşrûh üzere olduğunu müdde‘iyûn-ı mezbûrûn bi-tamamihâ tâyi‘an ve kat‘iyyen ikrâr ü i‘tirâf etmeğin ber-mûceb-i emr-i âlî müdde‘iyûn-ı mezbûrûn ücret mütâlebesiyle merkūm el-Hâc Mustafa Ağa’ya bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 9 Rebî‘ülâhir sene 1223.