İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 338 Hüküm no: 317 Orijinal metin no: [42b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa’nın Oturakçı Veliyüddin Odabaşı aleyhindeki cariye talebinden men edilmesi Câriye da‘vâsından mu‘ârazadan men‘ Ma‘rûz Kozlucalı Salih Ağa b. Mehmed meclis-i şer‘-i münîrde Oturakçı Veliyüddin Odabaşı b. ( ) muvâcehesinde beş yüz guruş kıymetli bir re’s zenciye câriye rıkka münkāde yedimde mülküm iken târih-i i‘lâmdan on gün mukaddem firâr ve İstanbul’da Alaca Hamamı kurbünde vâki‘ mezbûr Veliyüddin Odabaşı’nın menziline girip hâlâ mezbûrun yedinde olmağla zikr olunan câriyeyi bana teslîme mezbûra tenbîh olunmak matlûbumdur deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mezbûr Veliyüddin odabaşı bi’l-muvâcehe vech-i şer‘î üzere tahlîf olunmağın mûcebince müdde‘î-i mezbûr Salih Ağa da‘vâ-yı mezkûresiyle merkūm Veliyüddin Odabaşı’ya bilâ-beyyine mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 3 Rebî‘ülâhir sene 1223.