İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 340 Hüküm no: 320 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Derviş Mehmed ve kız kardeşi Şerife Ayşe Hatun’un Habibe aleyhindeki menzil davalarında haksız oldukları Kadırga Limanı’nda menzil nizâ‘ı Ma‘rûz Mübârek Rikâb-ı kamer-tâb-ı hüsrevânîye takdîm-i arzuhâl eden es-Seyyid Derviş Mehmed ve kız karındaşı zâtı mu‘arrefe Şerife Âişe Hatun evlâd-ı es-Seyyid Derviş Abdülkerim b. el-Hâc Abdullah evvelâ Çarşamba günü Arz Odası’nda huzûr-ı hazret-i kāimmakām-ı âlî-makāmîde ve ba‘dehû du‘âhânemizde ma‘kūd meclis-i şer‘-i münîrde vâlideleri Emine bt. Mehmed Emin nâm hatun hâzıra olduğu hâlde zikri âtî menzile ba-temessük-i mütevellî mutasarrıf ve ol-vechile vâzı‘atü’-yed olan Habibe bt. İsmail nâm hatun muvâcehesinde İstanbul kādıları fazîletlü efendiler nezâretlerinde âsûde evkāfdan İstanbul’da Kadırga Limanı kurbünde Kâtib Sinan mahallesi Mescid-i şerîfi Vakfı musakkafâtından mahalle-i mezbûrede kâin beher şehr yirmi akçe icâre-i müecceleli ma‘lûmü’l-hudûd ve’l-müştemilât bir bâb menzil babamız olup bundan akdem vefât eden mezbûr es-Seyyid Derviş Abdülkerim’in bâ-temessük-i mütevellî bi’l-icâreteyn taht-ı tasarrufunda iken babamız mezbûr bin iki yüz on bir senesi Şa‘bânı’nın on yedinci günü menzil-i mezkûru maraz-ı mevti hâlinde kendüyü ölünceye değin görüp gözetmek şartıyla bâ-re’y-i mütevellî vâlidemiz hâzıra-i mezbûreye fâriğ olup ba‘de vefâtihî vâlidemiz mezbûre Emine Hatun dahi menzil-i mezkûru iki yüz on dört senesi Zilka‘desi’nin yirmi beşinci günü Peyk Mehmed Ağa b. Mustafa’ya bâ-re’y-i mütevellî fâriğa olup ba‘dehû mezbûr Mehmed Ağa fevt ve menzil-i mezkûr sulbî sagīr oğulları Yakub ve İsmail ve sulbiye kızı mürâhıka Nesibe’ye ba‘de’l-intikāl sagīrân-ı mezbûrânın vâlideleri ve bâ-hüccet vasîleri mezbûre Habibe Hatun bi’l-vesâye ve mürâhıka-i mezbûre bi’l-asâle izin hücceti mûcebince el-Hâc Mustafa Ağa’ya iki yüz yirmi bir senesi Cemâziyelâhire’nin on altıncı günü fâriğalar oldukdan sonra mezbûr el-Hâc Mustafa Ağa dahi işbu mezbûre Habibe Hatun’a bâ-re’y-i mütevellî fâriğ olup [43b] ol-vechile menzil-i mezkûre mezbûre Habibe Hatun hâmiş-i arzuhâlde mastûr defter-i vakıfdan muhrec derkenâr mantûkunca mutasarrıf ve vâzı‘atü’l-yed olmağla biz dahi şart-ı müfsid ile ferâğ-ı evvelin adem-i sıhhatine binâen menzil-i mezkûru taleb ederiz deyü ba‘de’d-da‘vâ ve’l-istintâk mezbûre Habibe Hatun dahi cevâbında müdde‘iyân-ı mezbûrânın babaları müteveffâ-yı mezbûr es-Seyyid Derviş Abdülkerim hâl-i hayût ve kemâl-i akl ve sıhhatinde menzil-i mezkûru hüsn-i rızâ ve tayyib-i hâtırı ve ferâğ-ı mu‘teber-i kat‘î ile târih-i mezbûrda zevcesi hâzıra-i mezbûre Emine Hatun’a bâ-re’y-i mütevellî ferâğ ve tefvîz, ol dahi tefevvüz ve kabûl etdikden sonra zevcim müteveffâ-yı mezbûr Peyk Mehmed Ağa’ya hayûtunda bâ-re’y-i mütevellî fâriğa olup zevcim mezbûr dahi fevt oldukda üç nefer evlâdı mezbûrûna ba‘de’l-intikāl murâhika-i mezbûre Nesibe asâleten ve ben sagīrân-ı mezbûrânın vasîleri olmamla vesâyeten menzil-i mezkûru bâ-re’y-i mütevellî mezbûr el-Hâc Mustafa Ağa’ya fâriğalar olup mezbûr el-Hâc Mustafa dahi menzil-i mezkûru bâ-re’y-i mütevellî bana fâriğa olup ol-vechile zabt ve tasarruf eylediğimden mâ‘adâ müdde‘iyân-ı mezbûrânın babaları müteveffâ-yı mezbûr es-Seyyid Derviş Abdülkerim hayatında menzil-i mezkûra ve şurût-ı müfside müdde‘âsına müte‘allika âmme-i de‘âvîden zevcesi hâzıra-i mezbûre Emine Hatun’un zimmetini kabûlünü hâvî ibrâ ve iskāt etmiş idi deyü hâzıra-i mezûrenin ve mütevellî-i vakf-ı mezbûrun tasdîkleriyle sûret-i def‘de eylediği da‘vâsını udûlden İmâm Osman Efendi b. Ahmed ve es-Seyyid Mehmed Tâhir Efendi b Hüseyin şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iyân-ı mezbûrân da‘vâ-yı mezkûreleriyle mezbûre Habibe Hatun’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 6 Rebî‘ülâhir sene 1223.