İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 342 Hüküm no: 321 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ömer’in Ayşe bt. Mustafa ve eşi Hacı Ahmed aleyhindeki menzil iddiasının meşrû olmadığı ve yanan menzilin aslına uygun olarak inşası hususunda Ayşe bt. Mustafa ve eşine izin verilmesi Galata’da Arab Câmi‘i karşısında bir bâb mahzenin havavı nizâ‘ı Ma‘rûz Sâhib-i arzuhâl el-Hâc Ömer b. el-Hâc Ömer nâm kimesne meclis-i şer‘-i münîrde kendi nefsinden asîl ve zevcesi Âişe bt. Mustafa nâm hatun tarafından husûs-ı âtîde vekîl olduğu zâtını ârifân Müezzinbaşı es-Seyyid Hasan Efendi b. Mustafa ve Halil Ağa b. Mehmed şehâdetleriyle sâbit olan el-Hâc Ahmed b. el-Hâc Hüseyin nâm kimesne muvâcehesinde İstanbul kādıları fazîletlü efendiler nezâretlerinde âsûde evkāfdan Cebecibaşı-yı esbak merhûm Mustafa Ağa vakfının mütevellîsi Mustafa Ağa hâzır olduğu hâlde vakf-ı mezbûr musakkafâtından mahrûse-i Galata’da Arab Câmi‘-i şerîfi karşısında kâin ma‘lûmü’l-hudûd bir bâb manzen benim bi’l-icâreteyn bâ-temessük-i mütevellî taht-ı tasarrufumda ve mahzen-i mezkûr verâsında vâki‘ bir bâb menzil ve mahzen-i mezkûr havası zevcân-ı mezbûrânın kezâlik bi’l-icâreteyn bâ-temessük-i mütevellî iştirâken taht-ı tasarruflarında olup lâkin sâlifü’z-zikr menzil ve mahzen bundan akdem bi-kazâillâhi te‘âlâ vukū‘ bulan harîkde muhterik olmağla zevcân-ı mezbûrân menzil-i mezkûru bu esnâda kadîmi üzere binâya mübâşeret etmekle zikr olunan mahzenim havasına binâ vaz‘ etmeyip alâ-hâlihî terk etmek üzere asıl ve vekîl-i mezbûra tenbîh olunmak matlûbumdur deyü da‘vâ etdikde husûs-ı mezbûr mütevellî-i hâzır-ı mezbûr Mustafa Ağa’dan istintâk olundukda ol dahi cevâbında mârrü’l-beyân mahzen ve menzil vakf-ı mezbûr musakkafâtından olup mahzen-i mezkûr müdde‘î-i merkūm el-Hâc Ömer Ağa’nın ve menzil-i mezkûr ile mahzen-i mezkûr havası zevcân-ı mezbûrânın ber-vech-i muharrer uhde-i tasarruflarında olmağla kadîmi üzere menzil, mahzen-i mezkûr havasına binâ ve inşâ olunduğu vakf-ı mezbûra enfa‘ ve kadîmi dahi vech-i meşrûh üzere olduğuna binâen kadîmi üzere binâ olunsun deyü eylediği takrîrini müdde‘î-i mezbûr el-Hâc Ömer tasdîk ve ikrâr eylediğinden mâ‘adâ müdde‘î-i mezbûrun tasaddî eylediği da‘vâsı dahi meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle zevcân-ı mezbûrâna bî-vech-i şer‘î mu‘ârazadan ba‘de’l-men‘ kadîmî üzere menzil-i mezkûr mahzen-i merkūm havasına binâ ve inşâ etmek üzere kabûlü hâzır-ı mezbûrun re’yiyle zevcân-ı mezbûrân el-Hâc Ahmed ve Âişe Hatun’a izin verildiği İstanbul Mahkemesi’nden huzûr-ı [âlîlerine i‘lâm olundu]. Fî 7 Rebî‘ülâhir sene 1223.