İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 363 Hüküm no: 345 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. İbrahim’in, hürriyetini ispat ederek serbest bırakılan Şerife Meryem için ödediği parayı Esirci Ahmed Beşe’den geri alması 1355 guruş hüküm Ma‘rûz Rıkka inkıyâdı olmağla ber-vech-i âtî kıbel-i şer‘den da‘vâya me’zûne olan ma‘lûmetü’l-esnâf on bir yaşında Şerife Meryem nâm murâhika meclis-i şer‘-i münîrde rıkk olmak üzere kendüye vâzı‘atü’l-yed olan zâtı mu‘arrefe Emine bt. İbrahim nâm hatun mahzarında ben vilâyet-i Anadolu’da Diyarbekir kazâsına tâbi‘ Kiki kurâlarından Şemzi nâm karye ahâlisinden hurrü’l-asl es-Seyyid Ali’nin firâşından hâsıla ve zevcesi hürretü’l-asl Fatıma’dan mütevellide hürretü’l-asl olup bana ve ebeveynim mezbûrâna kat‘a rıkk târî olmuş değil iken mezbûre Emine Hatun rıkk olmak üzere bi-gayrı hakkın bana vaz‘-ı yed etmekle sebîlim tahliye olunmak matlûbumdur deyü da‘vâ etdikde ol dahi cevâbında murâhika-i mezbûreyi işbu hâzır bi’l-meclis Esirci Ahmed Beşe b. Hasan’dan Gürciyyetü’l-asl rıkk olmak üzere bin üç yüz elli beş guruş semen-i medfû‘a ve makbûza işbu târihden sekiz ay mukaddem iştirâ ve kabz etmiş idim deyü vaz‘-ı yedini ikrâr mâ‘adâyı inkâr etmekle müdde‘iye-i murâhika-i mezûre ber-vech-i muharrer müdde‘âsını lede’t-tezkiye adâletleri zâhir olan kazâ-i mezbûre tâbi‘ Emruk? karyesi ahâlisinden es-Seyyid Mustafa b. es-Seyyid Hüseyin ve Ali Beşe b. Mehmed nâm kimesneler bi’l-muvâcehe vech-i şer‘î üzere isbât etmeğin mûcebince murâhika-i mezbûre Şerife Meryem’in hürriyetine hükm ve sebîli tahliye olundukdan sonra mezbûre meblağ-ı merkūm bin üç yüz elli beş guruşu mezbûrdan bi’l-mürâca‘a taleb ederim deyü da‘vâ, ol dahi kaziyye minvâl-i meşrûh üzere olduğunu bi-tamamihi tâyi‘an ve kat‘iyyen ikrâr u i‘tirâf ve müdde‘iye-i mezbûreye edâsıyla ilzâm olunduğu İstanbul Mahkemesi’nden huzûr-ı [âlîlerine i‘lâm olundu]. Fî 25 Rebî‘ülevvel sene 1223.