İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 362 Hüküm no: 344 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mücellid esnafı iken kağıtçılık esnafına girmiş olan Seyyid Hafız Halil Efendi ve sairlerine kağıtçılar esnafı tarafından müdahale olunmaması Kâğıdçılara dâir Ma‘rûz Âsitâne-i aliyye’de kâin mücellid esnâfından es-Seyyid Hafız Halil Efendi ve Süleyman Efendi ve es-Seyyid Hafız Mustafa Efendi ve es-Seyyid Süleyman Efendi ve es-Seyyid el-Hâc İbrahim Ağa ve es-Seyyid Mehmed Ârif Ağa ve el-Hâc Mehmed Ağa ve Ahmed Ağa ve Molla Sadık ve diğer el-Hâc Mehmed Ârif ve es-Seyyid İbrahim Edhem Ağa ve Mehmed Ağa ve Süleyman Ağa ve İsmail ve sâirleri meclis-i şer‘-i münîrde Âsitâne-i aliyye’de vâki‘ Kâğıdçıbaşı Vekîli Ahmed Ağa ve kethudâları es-Seyyid Mehmed Ağa ve esnâfdan el-Hâc Mehmed Efendi ve Hafız Ahmed Efendi ve Yahya Efendi ve Hafız Mehmed Efendi ve Aziz Mahmud Efendi ve el-Hâc İsmail Ağa ve el-Hâc Mehmed Ağa ve Solak Hüseyin Ağa ve Ali Ağa ve Mehmed Ağa ve es-Seyyid Mehmed Ağa ve Hüseyin Ağa ve es-Seyyid Ahmed Ağa ve es-Seyyid Hüseyin ve diğer Mehmed Ağa ve es-Seyyid Feyzi Odabaşı ve Süleyman Odabaşı ve Süleyman Usta ve Mustafa Usta ve sâir bi’l-cümle kâğıdçı esnâfı muvâcehelerinde bizler an-aslin mahalle esnâfı olup san‘atımızla melûf ve mezbûrûn dahi kâğıdçı esnâfı olmağla kâğıd bey‘ ü şirâsı mezbûrûna mahsûs ve ol-vechile her birimiz san‘atlarımız ile ta‘ayyüş ve intifâ‘ edegelmiş iken altmış seneden mütecâviz kâğıdçı esnâfı mezbûrûn bizlerden mebâliğ-i ma‘lûme ahzıyla bizleri kâğıdçılıkda usta edip kâğıd bey‘ ü şirâsına ilhâk ve ilâ-hâzihi’l-ân kâğıdcılar ile ma‘an pay alıp bu vechile ta‘ayyüş ve intifâ‘ eder iken esnâf-ı mezbûrûn bu esnâda bizleri hilâf-ı şer‘-i şerîf ve bilâ-fermân-ı âlî kâğıd bey‘ ü şirâsından men‘a tasaddî ve müdâhale etmeleriyle müdâhaleleri men‘ ü def‘ olunmak matlûbumuzdur deyü ba‘de’d-da‘vâ ve’l-istintâk onlar dahi cevâblarında kaziyye minvâl-i meşrûh üzere olduğunu ikrâr ü i‘tirâf edip lâkin bunların böyle kâğıd bey‘ ü şirâları bizim kâr ü kisbimize noksân târî olacağını mûcib bir keyfiyet olmağla binâen-aleyh müdâhale ederiz demeleri hilâf-ı şer‘-i şerîf olmağla a‘zâr-ı vâhiyelerine şer‘an iltifât olunmayıp bî-vech-i şer‘î müdâhalelerinin men‘ ü def‘i için kendülere tefhîm ve tenbîh olunup ve fîmâ-ba‘d müdâhale etmemeleri için fermân-ı âlîleri sudûrunu istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî 21 R sene 1223.