İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 364 Hüküm no: 347 Orijinal metin no: [47a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Nikola’nın, Kalaycı esnafından Çömlekçilerli Mustafa Usta’dan satın almış olduğu dükkânın satış işleminin geçersiz olması Eyüb’de Kalaycı gediği Ma‘rûz Meremmâtçı kazgancı tâifesinden Kostantin v. Nikola nâm zimmî meclis-i şer‘-i hatîrde kalaycı esnâfından Çömlekçilerli Mustafa Usta b. Hasan nâm kimesne muvâcehesinde esnâf-ı merkūme kethudâsı Hüseyin Usta ve yiğitbaşısı İbrahim Usta ve ihtiyârlarından Yusuf Usta ve Hafız Mustafa Usta ve Ali Usta ve Mustafa Odabaşı ve Halil Usta ve Molla Ali ve Hüseyin Usta ve diğer Halil Usta ve İbrahim Usta ve sâirleri hâzır oldukları hâlde medîne-i hazret-i Ebâ Eyyûbe’l-ensârî -radiye anhu Rabbihi’l-bârî’de- Çömlekçiler nâm mahâlde kâin bir bâb kadîm kalaycı dükkânının kirâsı şehriye altmış para olarak mezbûr Mustafa Usta’nın bi’l-icâreteyn bâ-temessük-i mütevellî taht-ı tasarrufunda ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yine mezbûrun yedinde mülkü olmağla mezbûr Mustafa usta bundan akdem dükkân-ı mezkûr derûnunda olan gedik [47b] âlâtını âhar mahalle kaldırıp beni temekkün etdirmek üzere dükkân-ı mezkûru dört yüz elli guruş bedel-i medfû‘ ve makbûza bana bâ-ma‘rifet-i mütevellî ferâğ ve tefvîz, ben dahi tefevvüz ve kabûl ve dükkân-ı mezkûr derûnunda temekkün murâd eylediğimde esnâf-ı hâzırûn-ı mezbûrûn bizim gediklerimiz yedimizde olan mümzâ ve mahtûm defter ve fermân-ı âlî-şân mantûklarınca mahalleri tasrîhiyle ma‘dûd ve mu‘teber olup ziyâde ve noksân olmaması şurût-ı nizâm-ı mer‘iyemizden olduğundan mâ‘adâ bilâ-mûcib gedik nakli husûsuna dahi râzılar değilleriz deyüp ve bu makūle menzil ve dekâkin mutasarrıfları ehl-i İslâm’dan olanlar zimmîlere fâriğ olmasınlar deyü fermân-ı âlî-şân dahi sâdır olmağla ber-mûceb-i emr-i âlî ve şurût-ı nizâm dükkân-ı mezkûru yine sâhib-i evveli mezbûr Mustafa Usta’ya bâ-re’y-i mütevellî fâriğ-i evvel deyü beni dükkân-ı mezkûrda temekkün etdirmemeleriyle esnâf-ı hâzırûn-ı mezbûrûna tenbîh olunup müdâhaleleri men‘ ü def‘ olunmak matlûbumdur deyü esnâf-ı hâzırûn-ı mezbûrûnun tasdîkleriyle eylediği da‘vâsını mezbûr Mustafa Usta ikrâr ü i‘tirâf edip lâkin bu makūle vakıf menzil ve dekâkin mutasarrıfları ehl-i islâmdan olup zimmî tâifesine ferâğı ber-mûceb-i emr-i âlî-şân-ı mezkûr memnû‘ olmağla müdde‘î-i mersûm Kostantin zimmînin merkūm Mustafa Usta’ya bedel olmak üzere medfû‘u olan meblağ-ı merkūm dört yüz elli guruşu müdde‘î-i mersûma geri redd ü teslîm ve dükkân-ı mezkûru sâhib-i evveli mezbûr Mustafa Usta’ya ferâğa tarafeynden her birine ba‘de’t-tenbîh dükkân-ı mezkûr ve derûnunda olan âlât-ı lâzımesi kalaycı gediği olup mu‘teber olmak üzere kemâ-kân mahâllinde ibkā olunmasını esnâf-ı hâzırûn-ı mezbûrûn istirhâm eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 21 Rebî‘ülâhir sene 1223.