İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 366 Hüküm no: 348 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sulumanastır yanındaki vakıf kasap dükkânı kiracısı Kasap İshak Beşe’nin çocuksuz vefatı nedeniyle dükkânın Ebubekir b. Mehmed’e kiralanması Sulumanastır’da kasab Ma‘rûz Hudâvendigâr-ı sâbık cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- evkāf-ı şerîfesi mülhakātından İstanbul’da Sulumanastır kurbünde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye vakf-ı müşârün-ileyh mütevellîsi temessüküyle mutasarrıf olan Kasab İshak Beşe bilâ-veled fevt olup gedik-i mezkûr cânib-i vakfa âid olduğu ihbâr olunmağla âlât-ı lâzıme-i mezkûreyi ber-vech-i âtî istîcâra tâlib kasab esnâfından işbu bâ‘isü’l-i‘lâm Ebûbekir b. el-Hâc Mehmed meclis-i şer‘-i münîrde vakf-ı müşârün-ileyh kāimmakām-ı mütevellîsi Dârüssa‘âde Ağası Kâtibi Hafız el-Hâc Mustafa Efendi tarafından umûr-ı vakfı rü’yete vekîl-i müsecceli câbi-i vakıf Halil Efendi b. Ahmed mahzarında Hâssa Kasabbaşısı izzetlü Mustafa Ağa tarafından mürsel Kasablar Kethudâsı Süleyman Ağa ve sâir mazbûtü’l-esâmî kasablar ustaları hâzır oldukları hâlde takrîr-i kelâm edip kāimmakām-ı mütevellî merkūm tarafından vekîl-i müsecceli mezbûr Halil Efendi gedik ta‘bîr olunan âlât-ı lâzıme-i mezkûreyi müteveffâ-yı merkūmun mahlûlünden sûk-ı sultânîde ba‘de’l-müzâyede ve inkıtâ‘ı’r-rağbe el-yevm mu‘accele mümâsili olduğu bi’l-ihbâr mütehakkık olan yedi yüz yirmi guruş mu‘accele ile taraf-ı vakf-ı müşârün-ileyhden kāimmakāmlığı hasebiyle bana îcâr ve teslîm, ben dahi ber-vech-i muharrer istîcâr ve tesellüm ve kabûl ve mu‘accele-i merkūm yedi yüz yirmi guruşu taraf-ı vakıf için vekîl-i mezbûra teslîm ve umûr-ı vakf-ı müşârün-ileyhe sarfla istihlâke emir etmemle ol dahi kabz ve umûr-ı vakfa sarfla ba‘de’l-istihlâk mu‘accele-i müstehleke-i merkūmenin adem-i istifâsına ve bi’l-cümle husûs-ı merkūma müte‘allika âmme-i de‘âvîden taraf-ı vakfı ve kāimmakām-ı mütevellî-i merkūm ile vekîl-i mezbûrun zimmetlerini kabûlü hâvî ibrâ ve iskāt eyledim dediğini kāimmakām-ı mütevellî vekîli mezbûr tasdîk etmeğin sâlifü’l-beyân gedik ta‘bîr olunan âlât-ı lâzıme müteveffâ-yı merkūmun mahlûlünden vech-i meşrûh üzere mezbûr Ebûbekir’e îcâr olunduğunu müş‘ir zabıt ve tasarrufu için taraf-ı vakf-ı müşârün-ileyhden temessük i‘tâsı istid‘â eylediği İstanbul Mahkemesi’nden huzûr-ı [âlîlerine i‘lâm olundu]. Fî 22 Rebî‘ülâhir sene 1223.