İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 376 Hüküm no: 362 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah ile kızı Ayşe’nin berber dükkânı gediği hisselerini Mehmed Usta’ya satmaları 110 guruşa berber gediğin bey‘ ve yedine sûret i‘tâsı istid‘â Ma‘rûz Hâmiş-i arzuhâlde mastûr Başmuhâsebe’den mahtûm derkenâr nâtık olduğu üzere İstanbul’da Kumkapı kurbünde İbrahim Paşa Câmi‘-i şerîfi civârında Keresteci dükkânı karşısında es-Seyyid Mustafa Usta’nın üst yanında kâin Ömer Usta dükkânı demekle ma‘rûf bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin mâliki olup bundan akdem vefât eden mezbûr Ömer Usta b. Mehmed’in verâseti zevce-i menkûha-i metrûkesi Emine bt. Abdullah nâm hatun ile sulbî kebîr oğlu Mehmed Usta ve sulbî kebîr kızı Âişe Hatun’a ba‘de’l-inhisâr kendi nefsinden asıl ve vâlidesi mezbûre Emine Hatun tarafından husûs-ı âtîde vekîl olduğu zâtı ârifân Ahmed b. Mustafa ve İsmail b. Ali şehâdetleriyle sâbit olan zâtı mu‘arrefe mezbûre Âişe Hatun meclis-i şer‘-i münîrde sâhib-i arzuhâl merkūm Mehmed Usta mahzarında berber esnâfının kethudâsı Hüseyin Ağa ve şeyhleri es-Seyyid Osman Efendi ve du‘âcıları es-Seyyid Mehmed Efendi ve yiğitbaşıları es-Seyyid Ömer Ağa ve Çavuşları Mustafa Ağa ve ustalarından es-Seyyid Mustafa ve es-Seyyid Mustafa ve es-Seyyid İsmail ve sâirleri hâzır oldukları hâlde gedik ta‘bîr olunan âlât-ı lâzıme-i ma‘lûme mûrisimiz babam müteveffâ-yı mezbûrun hayatında ile’l-vefât yedinde müstakıllen mülkü olup ba‘de vefâtihî bize mevrûs olmağla hâlâ ben ve vâlidem müvekkile-i mezbûre gedik-i mezkûrdan bi’l-irsi’ş-şer‘î mâlikeler olduğumuz yirmi dört sehm i‘tibârıyla on sehm hisse-i şâyi‘amızı tarafeynden bi’l-îcâb ve’l-kabûl bâtten ve sahîhan karındaşım merkūm Mehmed Usta’ya yüz on guruş semen-i makbûza bi’l-asâle ve bi’l-vekâle bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini bi’l-asâle ve bi’l-vekâle kabûlü hâvî ibrâ ve iskāt eyledik, fîmâ-ba‘d zikr olunan berber dükkânı gediğinin mecmû‘u karındaşım merkūm Mehmed Usta’nın irsen ve şirâen mülk-i mahzı ve hakk-ı sırfı olmuşdur dedikde ol dahi tasdîk etmeğin gedik-i mezkûr babası müteveffâ-yı mezbûr Ömer Usta ismine mukayyed olmağla kaydı ref‘ ü terkīn ve oğlu merkūm Berber Mehmed Usta uhdesinde kayd ve yedine sûret i‘tâsını hâzırûn-ı merkūmûn her biri istid‘â ve istirhâm eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 2 Ca sene 1223.