İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 378 Hüküm no: 364 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nako v. Papa Kosta’nın kasap dükkânı hissesinin vârisleri tarafından Yani v. Kirko’ya satılması Kasab nizâ‘ı Ma‘rûz Hudâvendigâr-ı esbak cennet-mekân firdevs-âşiyân Gāzi Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden beşinci salhâneye merbût İstanbul’da Kumkapı Nişâncı Câmi‘-i şerîfi kurbünde hamam karşısında dörtyol ağzında köşe başında kâin sebzeci dükkânına muttasıl bir bâb kasab dükkânı derûnunda mevcûde âlât-ı lâzıme-i ma‘lûmenin nısf-ı şâyi‘ine bâ-temessük-i mütevellî mutasarrıf olan Nako v. Papa Kosta zimmî hâlik olup zikr olunan nısf kasab dükkânı gediği sulbî kebîr oğlu Mitro zimmîye ve sulbiye kebîre kızları Zobiçe ve Marina ve Haşido? ve Saltana ve Eleniçe Nasrâniyelere âdiyen intikāl eylediği kassâbân esnâfının kethudâsı ve sâir mazbûtü’l-esâmî kasab ustaları ihbârlarıyla zâhir ve mütehakkık oldukdan sonra mersûm Mitro zimmî kendi nefsinden asâleten ve kız karındaşları mersûmât Zobiçe ve Marina ve Haşido? ve Saltana ve Eleniçe Nasrâniyeler taraflarından husûs-ı âti’l-beyânda vekîlleri olduğu şahıslarını bilir diğer Mitro v. Liko ve Liko v. Londo zimmîler şehâdetleriyle sâbit olmağla vekâleten meclis-i şer‘-i münîrde hâlâ hâssa kasabbaşısı izzetlü Mustafa Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustası bâ‘isü’l-i‘lâm Yani v. Kirko zimmî muvâcehesinde takrîr-i kelâm edip sâlifü’l-beyân gedik ta‘bîr olunan âlât-ı lâzıme-i ma‘lûmeden bi’l-intikāl mutasarrıf olduğumuz nısf hisse-i şâyi‘a-i mezkûremizi bi’l-asâle ve bi’l-vekâle mersûm Yani zimmîye hüsn-i rızâ ve tayyib-i ihtiyârımız ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm sâlifü’z-zikr nısf kasab gediği mersûm Yani zimmînin dâhil-i havza-i tasarrufu olup benim ve müvekkilât-ı mersûmâtın kat‘a alâka ve medhallerimiz kalmamışdır deyü ba‘de’l-ikrâr ve’t-tasdîk nısf gedik-i mezkûr hâlik-i mersûmun vereseleri mersûmûnun ber-vech-i meşrûh ferâğlarından mersûm Yani zimmî üzerine defter-i vakf-ı şerîfe ba‘de’l-kayd hâlik-i mersûmun temessükü hâmişine tahrîr ve temhîr ve nısf gedik-i mezkûr tasarrufu için mersûm Yani zimmî yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî 25 Rebî‘ülâhir sene 1223.