İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 379 Hüküm no: 365 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı Esnafı Kethuda vekili Salih Ağa ve sair esnaf ileri gelenlerinin, Anton v. Nağma’ın küreğe konulması talepleri Küreğe vaz‘ olunmasını istid‘â Mâ‘rûz Âsitâne-i aliyye’de vâki‘ sandalcı esnâfının kethudâ vekîli es-Seyyid Salih Ağa ve yiğitbaşıları es-Seyyid İbrahim ve es-Seyyid Mehmed ile müsinn ü ihtiyâr nizâm ustalarından Abdi Ağa ve es-Seyyid Halil Ağa ve es-Seyyid Abdülkerim ve es-Seyyid Ahmed ile re‘âyâ ustabaşıları Agob ve Hasköylü Ustabaşı Yani ve ustalarından İsak ve Anastaş ve Usturacı ve Praşkova ve sâir kırk neferden mütecâviz Müslim ve zimmîler meclis-i şer‘-i münîrde esnâf-ı merkūmeden Anton v. Nağama nâm zimmî muvâcehesinde mersûm Anton zimmî esnâfımızdan olup lâkin kendi ırzıyla mukayyed ve kâr ü kisbiyle meşgūl olmayıp tüccârın malını ahz ve itlâf eylediğinden mâ‘ada beynimizde cârî nizâm-ı kadîmimizin mugāyiri nice harekât-ı nâ-bercâya ictisâr ve esnâfımız beyninde dürlü fesâdı mûcib hâlât-ı reddiyeye ibtidâr ve şirâze-i nizâmımızın idlâline bâdî olup bi’d-defa‘ât kendüye nuhs u pend olundukda kat‘a mütenebbih olmayıp esnâfımız cesîm ve perâkende olmağla nizâmlarımızı vikāye ve esnâfımızı ihtilâlden muhâfaza zımnında mersûm Anton zimmî ıslâh-ı nefs oluncaya değin vaz‘-ı kürek ile tedîb olunmasını cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 4 [Cemâziyelevvel] sene 1223.