İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 386 Hüküm no: 372 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkova v. Dimitri’nin dükkânında tütün satmamak üzere taahhütte bulunması Kendi kârıyla meşgūl olmağla müte‘ahhid Ma‘rûz Âsitâne-i aliyye’de vâki‘ tütüncü esnâfının kethudâsı İbrahim Ağa ve esnâfından es-Seyyid Mustafa Ağa ve Şehremînli Mustafa Efendi ve Mehmed Şâkir Ağa ile re‘âyâdan Andonaki ve Dimitri ve Küçük Angeli ve Kiryako ve Paskal ve diğer Kiryako ve sâir Müslim ve zimmîler meclis-i şer‘-i münîrde zikri âtî gedik âlâtının mâliki olan Praşkova v. Dimitri zimmî muvâcehesinde İstanbul’da Zindankapısı hâricinde Çoban Çeşmesi civârında köşe başında tuzcu dükkânı ittisâlinde kâin bir bâb dükkânın gediği mersûm Praşkova zimmînin yedinde mülkü olmağla zimmî-yi mersûm dükkân-ı mezkûrda çorap ve süpürge bey‘ edip ol-vechile ta‘ayyüş eder iken kāni‘ olmayıp bu esnâda dükkân-ı mezkûra duhân vaz‘ ve bey‘ ve tütüncü dükkânı gediği ihdâs etmekle bizim dükkânlarımız Ma‘den Kalemi’nde mukayyed ve mu‘teber ve ma‘dûd olup müceddeden tütüncü dükkânı gediği ihdâsı hilâf-ı fermân-ı âli ve mugāyir-i nizâm-ı kadîm olduğundan mâ‘adâ esnâfımız beyninde cârî ve mu‘teber ve düstûrü’l-amel olan şurût-ı nizâmımızın ihtilâlini müstelzim nizâ‘ı mûcib bir keyfiyet olmağla dükkân-ı mezkûr kadîmi üzere çorapçı ve süpürgeci dükkânı olup tütüncü dükkânı olmamak üzere mersûma tenbîh olunmak murâdımızdır deyü cümlesi bi’l-ittifâk istintâk eylediklerinde zimmî-yi mersûmun vech-i muharrer üzere müceddeden tütüncü dükkânı küşâdı hilâf-ı emr-i âlî ve mugāyir-i şurût-ı nizâm olmağla dükkân-ı mezkûrda zimmî-yi mersûm duhân bey‘ etmeyip kadîmi üzere çorapçı ve süpürgeci dükkânı olarak ibkā olunmak üzere mersûm Praşkova zimmîye tefhîm olundukda ol dahi ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu]. Fî 15 Rebî‘ülâhir sene 1223.