İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 385 Hüküm no: 371 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koruk Mahmud mahallesi İmamı Hasan Efendi ve sair mahalle ahalisinin şikâyetçi oldukları Bostancı Hüseyin Ağa ve eşiyle anlaşma sağlanması Âhâli-i mahalle ile beynleri musâlaha olduğu Ma‘rûz İstanbul’da Koruk Mahmud mahallesi imâmı es-Seyyid Hasan Efendi ve müezzini Abdulkādir Efendi ve ahâlisinden es-Seyyid Ali Ağa ve es-Seyyid Ahmed Ağa ve Ali Ağa ve İbrahim Ağa ve Davud Ağa ve el-Hâc İsmail ve el-Hâc Ali Ağa ve diğer Ali Ağa ve Mehmed ve Hasan Ağa meclis-i şer‘-i münîrde yine mahalle-i mezbûre ahâlisinden Bostânî Hüseyin Ağa b. Hasan ve zevcesi zâtı mu‘arrefe Fatıma Hatun bt. Mehmed ve dâmâdı Derviş es-Seyyid Ali Efendi b. el-Hâc Ahmed muvâcehelerinde câr-ı mülâsıkı Kavukçu Topal Mehmed Ârif b. el-Hâc Ali hâzır olduğu hâlde mezbûrûn mahallemiz ahâlisinden olup lâkin mezbûre Fatıma ve kızı gāibe-i ani’l-meclis Zeyneb bt. Ali kendi hâllerinde ırzlarıyla mukayyedeler olmayıp dil-âzâr ve hadîdü’l-lisân olduklarından mâ‘adâ târih-i i‘lâm günü hâzır-ı mezbûrun zevcesi gāibe-i ani’l-meclis Âişe bt. Abdullah nâm hatuna şütûm-ı galîza ile şetm etmeleriyle ol-vechile mezbûrûndan bir dürlü emn ü rahatımız meslûbdur deyü teşekkî eylediklerinde istikşâf-ı hâl için kıbel-i şer‘den mürsel Kâtib Hasan Efendi dâ‘îleri mahalle-i mezbûrede vâki‘ hâzır-ı mezbûr Mehmed Ârif’in menziline varıp cerîdede mazbûtü’l-esâmî Müslimîn ahâli-i mahalle huzûrlarında akd-i meclis-i şer‘-i âlî etdikde zâtı mu‘arrefe mezbûre Âişe Hatun meclis-i ma‘kūd-ı mezkûrda kezâlik zâtları mu‘arrefe merkūmetân Zeyneb ve Fatıma hatunlar mahzarlarında keyfiyeti ahâli-i mahalleden istifsâr eyledikde mezbûrûn Bostânî Hüseyin Ağa ve zevcesi Fatıma ve dâmâdı es-Seyyid Derviş Ali Efendi ve kızı Zeyneb mahallemize geleli müddet-i vâfire olup kendi hâllerinde ırzlarıyla mukayyedler iken ancak işbu gün mezbûre Âişe Hatun ile beynlerinde nizâ‘ ve mücâdele ve gavga ve birbirlerine ta‘zîri mûcib elfâzla şetm etmişlerdir dediklerinde, beynleri tevfîk ve ıslâh olunup her biri tasaddî eyledikleri da‘vâ-yı mezkûresinden meccânen fâriğalar olup ba‘de’l-yevm her biri hilâf-ı şer‘-i mutahhar hareket etmemeğe müte‘ahhid olduklarını kâtib-i mezbûr dâ‘îleri mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî ba‘de’l-inhâ ahâli-i mahalle-i müdde‘iyûn-ı mezbûrûn dahi şikâyetlerini terk ve tehîr edip bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 27 Rebî‘ülâhir sene 1223.