İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 388 Hüküm no: 374 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa ve vârisleri Mustafa, Emetullah ve Zeliha’da alacak iddia edenlerin alacaklarının taksitlendirilmesi Tecîl Ma‘rûz Havâss-ı refî‘a kazâsına tâbi‘ Topçular nâm mahâlde vâki‘ dört horoslu bir bâb habbâz değirmeni derûnunda mevcûde beyne’l-esnâf gedik ta‘bîr olunur on altı re’s bârgir ve ona isâbet eden sâir âlât-ı lâzıme-i ma‘lûme ile değirmen-i mezkûra merbût bir bâb fırın derûnunda mevcûde gedik âlât-ı lâzıme-i ma‘lûmenin mâliki olup bin iki yüz on yedi senesinde vefât eden Mehmed Ağa b. el-Hâc Abdullah’ın verâseti zevce-i menkûha-i metrûkesi Zeliha bt. Mehmed nâm Hatun ile sulbî kebîr oğlu Mustafa Ağa ve sulbiye kebîre kızı Emetullah Hatun’a ba‘de’l-inhisâr kapan tüccârlarından sâlifü’z-zikr değirmen ve fırına târih-i mezbûrdan beri verese-i mezbûrûnun bi-şarti’r-rücû‘ emirleriyle ma‘lûmü’l-keyl ve’l-fiyât cem‘an iki bin iki yüz seksen beş guruş iki paralık hınta verdin deyü meblağ-ı merkūmdan ber-vech-i âtî altı yüz doksan bir guruş iddi‘â eden sâhib-i arzuhâl zeytinci el-Hâc Hasan ve sekiz yüz on üç guruş iddi‘â eden Arab Câmi‘li Ahmed Efendi ve iki yüz yirmi beş guruş iddi‘â eden Arpacı Küçük Musa ve iki yüz altı guruş on üç para iddi‘â eden Duhâncı Mehmed Efendi ve yüz elli üç guruş iddi‘â eden Hasırcı Mehmed Hoca ve yetmiş dört guruş beş para iddi‘â eden es-Seyyid el-Hâc Veliyüddin Ağa ve elli guruş iddi‘â eden Çetecizâde İbrahim Ağa ve otuz beş guruş iddi‘â eden elli altı bölüğün Mustafa Beşe ve yirmi beş guruş iddi‘â eden Delihacıoğlu Mehmed Ağa ve on iki buçuk guruş dört para iddi‘â eden Küçük Hacı İsmail Ağa ve yine zikr olunan değirmen ve fırına târih-i mezbûrdan mukaddem müteveffâ-yı mezbûr Mehmed Ağa’nın hayatında bi-şarti’r-rücû‘ emriyle kezâlik ma‘lûmü’l-keyl ve’l-fiyât bin yüz otuz sekiz guruş üç paralık hınta verdik deyü meblağ-ı merkūmdan yüz on yedi guruş iddi‘â eden mezbûr Zeytinci el-Hâc Hasan ve üç yüz yetmiş yedi buçuk guruş iddi‘â eden Rıdvanzâde el-Hâc Abdi Ağa ve üç yüz on yedi guruş iddi‘â eden Büyük Halil Yazıcı ve yüz yirmi altı guruş iddi‘â eden Düğmeci el-Hâc Ahmed Ağa ve kezâlik yüz yirmi altı guruş iddi‘â eden Düğmeci Abdullah Ağa ve kırk dört buçuk guruş on para iddi‘â eden Kebecizâde Mehmed Ârif Ağa ve yirmi dokuz buçuk guruş on iki para iddi‘â eden Hafız Ali Efendi nâm kimesnelerden her biri meclis-i şer‘-i münîrde derûn-ı arzuhâlde mezkûrü’l-ism mezbûr Mustafa Ağa ile zâtları mu‘arrefe mezbûretân Zeliha ve Emetullah hatunlar mahzarlarında Habbâzân Kethudâsı Mustafa Ağa ve Uncular Kethudâsı es-Seyyid Mustafa Ağa ve bi’l-cümle nizâm ustaları hâzır oldukları hâlde Âsitâne-i aliyye’de ve Bilâd-ı selâse’de vâki‘ bi’l-cümle değirmen ve fırın gedikleri cânib-i mîrîye ve kapan tüccârına olan düyûna mukābil olup bizim dahi gerek verese-i mezbûrûnun ve gerek mûrisleri müteveffâ-yı merkūm [51b] Mehmed Ağa’nın hayatında bi-şarti’r-rücû‘ emirleriyle malımızdan değirmen ve fırın-ı mezkûre verdiğimiz ma‘lûmü’l-keyl ve’l-fiyât hınta semenlerinden ber-vech-i bâlâ atik ve cedîd min-haysü’l-mecmû‘ üç bin dört yüz yirmi üç guruş beş para alacak hakkımız olmağla meblağ-ı mecmû‘-ı mezkûru mezbûrûn Mustafa Ağa ve Zeliha ve Emetullah hatunlar bizlere edâ eylesin, eğer edâda mümâna‘at ederler ise yedimizde olan fermân-ı âlî-şân mantûkunca ber-mûceb-i şart-ı nizâm değirmen ve fırın-ı mezkûrun gedikleri semen-i misilleriyle âhara bey‘ ve semeninden cânibi-i mîrîye ve bizlere olan düyûnu edâ olunması matlûbumuzdur deyü da‘vâya tasaddî eylediğimizde, onlar dahi cevâblarında kaziyye minvâl-i meşrûh üzere olduğunu her biri tasdîk ve düyûn-ı mezkûreyi tâyi‘an ve kat‘iyyen ikrâr ü i‘tirâf edip lâkin hâlen ve def‘aten bir vechile edâya iktidârımız yokdur deyü ber-vech-i âtî tecîl ve taksîte tâlibler olduklarında beynimiz tevfîk ve ıslâh olunup el-hâletü hâzihî mezbûrûn Mustafa Ağa ve Zeliha ve Emetullah hatunlara mûrisleri müteveffâ-yı mezbûr Mehmed Ağa’nın düyûnu olan meblağ-ı merkūm bin yüz otuz sekiz guruş üç paranın dört yüz otuz sekiz guruşunu bize edâ ve teslîm biz dahi ahz ü kabz edip bâkī atik ve cedîd cem‘an iki bin dokuz yüz doksan beş guruş beş parayı işbu târih-i i‘lâmdan beher şehr yetmişer guruş verip mecmû‘unu kırk iki ay yirmi dört gün tamamına değin edâ ve îfâ etmek üzere rızâmızla tecîl ve taksît eyledik dediklerinde onlar dahi müdde‘iyûn-ı mukırrûn-ı mezbûrûn tasdîk ve meblağ-ı merkūm iki bin dokuz yüz doksan beş guruş beş parayı ber-vech-i muharrer müeccelen ve mukāssatan müdde‘iyûn-ı mezbûrûna edâya müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-gurreti Ca sene 1223.