İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 390 Hüküm no: 375 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı ve hoşabcı esnafından Aleksi v. Avrako ve Yani v. Nikola’nın dükkân gediklerini satacakları zaman kendi esnaflarından birine satmayı taahhüt etmeleri Mâlik olduğu hoşâbcı gediğini kendi esnâfına bey‘ edip âhara bey‘ etmemeğe ta‘ahhüd Ma‘rûz İstanbul’da hısnı ebvâbından Kumkapı dâhilinde vâki‘ ma‘lûmü’l-hudûd bir bâb aşçı ve hoşâbçı dükkânının bi’l-icâreteyn mutasarrıfı Papa Yani v. Anton tarafından husûs-ı âti’l-beyânda vekîl-i müseccel-i şer‘îsi Bakkāl Rizo v. Togodoş zimmî meclis-i şer‘-i hatîrde Âsitâne-i aliyye’de ve Bilâd-ı selâse’de vâki‘ aşçı ve hoşâbçı ve çevrenci esnâfının kethudâsı es-Seyyid el-Hâc Hasan Ağa ve Yiğitbaşı Ali Ağa ve bi’l-cümle esnâfı hâzır oldukları hâlde dükkân-ı mezkûr derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mâlikleri Aleksi v. Avrako ve Yani v. Nikola nâm zimmîler muvâcehelerinde mârrü’z-zikr aşçı ve hoşâbçı ve çevrenci dükkânları gedikleri Başmuhâsebe’de mukayyed ve mu‘teber ve ma‘dûd olup ancak müvekkilem râhib-i mesfûrun mutasarrıf olduğu dükkânın gediği mukayyed olmayıp lâkin esnâf-ı hâzırûn-ı merkūmûnun beynlerinde mu‘teber ve şurût-ı nizâmlarında dâhil ve müddet-i vâfireden beri aşçı ve hoşâbçı ve çevrenci dükkânı olarak derûnunda mevcûde gediği işbu mersûmân Aleksi ve Yani zimmîlerin ale’l-iştirâk yedlerinde mülkleri olup bu esnâda zimmîyân-ı mersûmân gedik-i mezkûru âhara bey‘ ile sâir kahvehâne misillü dükkâna tebdîl etmek murâd etmeleriyle âhar esnâfa bey‘ etmeyip yine esnâf-ı merkūmeden birine bey‘ etmek üzere mersûmâna tenbîh olunmak müvekkilim râhib-i mersûmun matlûbudur dedikde esnâf-ı hâzırûn-ı merkūmûn dahi istintâk olundukda onlar dahi hâl mukırr-ı vekîl-i mersûmun takrîrine mutâbık olup bizim dahi hilâf-ı şurût-ı nizâm âhar esnâfa bey‘ etmeleriyle bir vechile rızâmız yokdur dediklerinde mersûmân Aleksi ve Yani ve vekîl dahi husûs-ı mezkûru tasdîk ve gedik-i mezkûru her ne zaman bey‘ ederler isek yine aşçı ve hoşâbcı ve çevrenci esnâfına bey‘ edip âhar esnâfa bey‘ etmemek üzere ta‘ahhüd ve eğer hilâf-ı ta‘ahhüd âhar esnâfa bey‘ eder isek gedik-i mezkûra kat‘a amel ve i‘tibâr olunmasın deyüp bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 17 min-R sene 1223.