İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 442 Hüküm no: 425 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman ile eski kocası Mehmed Said Ağa’nın alacak verecek hususunda birbirlerinin zimmetlerini ibra ettikleri Meccânen birbirlerini ibrâ Ma‘rûz Derûn-ı i‘lâmda mezkûretü’l-ism mu‘arrefü’z-zât Âişe bt. Osman nâm hatun meclis-i şer‘-i münîrde zevc-i sâbıkı kezâlik derûn-ı i‘lâmda mezkûrü’l-ism Mehmed Said Ağa b. İbrahim nâm kimesne muvâcehesinde i‘lâm-ı mezkûr derûnunda tafsîl ü beyân olunduğu üzere benim mezbûr Mehmed Said Ağa zimmetinde beş kat câmeşûy semeninden bin iki yüz guruşdan bâkī dokuz yüz guruş alacak hakkım olmağla hâlâ taleb ederim deyü da‘vâya tasaddî eylediğimde ol dahi cevâbında müdde‘âmı külliyen inkârından mâ‘adâ yedimde emvâlim olan mecmû‘u beş yüz guruş kıymetli üçü âl ve ikisi mâi beş ihrâm ve üç kilim ve iki makrame ve bir sefer tası ve bir bakraç ve bir telâtîn matara ve bir bardak mahfazası ve bir çay bardağı ve yaldızlı beş şükûfe şişesi ve bir şükûfe bağçeliği ve iki pirinç ve sabun kutusu ve iki kerevet ve iki çifthâne ve üç sandalye ve bir filika ve bir şerbet süzeğisi ve bir sagīr polat tepsi ve bir lenger ve bir fener ve bir elmas-traş kahve kâsesi ve bir Saksonya bardak ve on beş keyl şa‘îr ve üç keyl pirinç ve on iki çeki hatab ve sekiz yüz vakıyye kömürümü sen bi-gayrı hakkın ahz ü kabz etmenle eşyâ-i muharrere-i mezkûre mevcûde ise a‘yânını müstehleke ise ba‘de’s-sübût kıymet-i şer‘iyelerini ve ben bundan akdem senin bi-şarti’r-rücû‘ emrinle mutasarrıfe olduğun menzilin ta‘mîr ve termîmine malımdan yedi yüz guruş harc ü sarf etmemle meblağ-ı merkūmu dahi bi’l-mürâca‘a taleb ederim deyü benden da‘vâya tasaddî ve ol-vechile beynimizde ba‘de vukū‘i’l-münâza‘a bâ-vesâtet-i muslihîn beynimiz tevfîk ve ıslâh olunup herbirimiz tasaddî eylediğimiz da‘vâ-yı mezkûremizden bi’t-tav‘ ve’r-rızâ meccânen fâriğler olup bi’l-cümle husûs-ı mezkûra ve hukūk-ı zevciyete ve ibtidâ-i zevciyetden işbu târih-i i‘lâma gelince sâir beynimizde cereyân eden cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika mutlaka âmme-i de‘âvî ve kâffe-i mutâlebâtdan herbirimiz âharın zimmetini ibrâ-i âmm-i sahîh-i şer‘î ile ibrâ ve ıskāt ve herbirimiz ber-vech-i meşrûh âharın ibrâsını kabûl eyledik dedikde mukırre-i mezbûre Âişe Hatun’un bi’l-cümle takrîr-i meşrûhasını mezbûr Mehmed Said tahkīk ve tasdîk ve ber-vech-i muharrer kabûlü hâvî ibrâ eylediği tâyi‘an ve kat‘iyyen ikrâr ü i‘tirâf edip bu vechile külliyen kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 25 min-Cemâziyelâhir sene [1]1223.