İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 441 Hüküm no: 424 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Mihal’in Serope v. Kigork’dan satın aldığı Horhor’daki tütüncü dükkânı gediğini Zindan Kapısı haricinde Çardak denilen mahalle naklettiği Tütüncü gediği nakli Ma‘rûz Hâmiş-i arzuhâlde mastûr derkenâr nâtık olduğu üzere İstanbul’da Aksaray kurbünde Horhor’da Acıçeşme’de kâin Ma‘den Kalemi’nde Serkiz dükkânı demekle arîf, mukayyed ve mu‘teber bir bâb tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin tedâvül-i eyâdî ile mâliki olan Serope v. Kigork nâm zimmî meclis-i şer‘-i münîrde tütüncü esnâfının kethudâsı İbrahim Ağa ve yiğitbaşısı es-Seyyid Abdullah ve esnâfından Şehremînli Mustafa Ağa ile sâir mazbûtü’l-esâmî kimesneler hâzır olduğu hâlde bâ‘isü’l-i‘lâm Dimitri v. Mihal zimmî muvâcehesinde takrîr-i kelâm edip hâlâ ben bâlâda mezkûr tütüncü dükkânı derûnunda mevcûde mu‘teber ve mukayyed gedik âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safaka-i vâhide yüz yetmiş beş guruş semen-i medfû‘ ve makbûza mersûm Dimitri zimmîye bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyledik ba‘de’l-yevm gedik ta‘bîr olunan âlât-ı lâzıme-i muharrere-i mezkûrede benim aslâ ve kat‘a alâka ve medhalim kalmayıp mersûm Dimitri zimmînin mülk-i müşterâsı olmuşdur deyü ba‘de’l-ikrâr ve’t-tasdîk müşterî-i mersûm Dimitri meclis-i şer‘de takrîr-i kelâm edip gediğini iştirâ eylediğim dükkân-ı mezkûrun mülk sâhibine lüzûmu olmağla gedik-i merkūm âhar dükkâna nakl olunmak şurût-ı mer‘iyeden olduğuna binâen iştirâ eylediğim âlât-ı mezkûreyi İstanbul’da Zindan Kapısı hâricinde Çardak ta‘bîr olunur mahâlde Kolluk tahtında kâin Ayasofya-i kebîr Vakfı müsakkafâtından bi’l-icâreteyn taht-ı tasarrufumda olup kimesnenin gediği olmayan bir bâb dükkâna nakl ve ber-vech-i muharrer Ma‘den Kalemi’ne kayd olunmak murâdımdır dedikde bu misillü tütüncü dükkânı mülk sâhibine lüzûmu oldukda tütüncü gediğinin nakli şurût-ı mer‘iyelerinden olduğunu kethudâ ve yiğitbaşı ve ihtiyârları hâzırûn-ı merkūmûn haber vermeleriyle mârrü’z-zikr Acıçeşme’de olan dükkân ba‘de’l-yevm tütüncü dükkânı olunmak şartıyla gediği zikr olunan Kolluk tahtında kâin mersûm Dimitri zimmînin tasarrufunda olan dükkân-ı mezkûrda mu‘teber olmak üzere dükkân-ı evvelin gedik kaydı ilgā ve mersûm Serkiz zimmî üzerinden ref‘ ü terkīn ve mahâll-i sâniyede müşterî-i mersûm Dimitri zimmî üzerine kayd birle yedine sûret i‘tâ olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 25 min-Cemâziyelâhir sene 1223.