İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 443 Hüküm no: 427 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serdengeçdi ağalarından Mehmed Ağa’nın kendisine kahve gediğini satmaktan vazgeçen Osman Çavuş aleyhine açtığı davanın meşru olmadığı Mu‘ârazadan men‘ Ma‘rûz Sâhib-i arzuhâl serdengeçdi ağalarından Mehmed Ağa b. Ebîbekir nâm kimesne meclis-i şer‘-i münîrde Tersâne-i âmire çavuşlarından derûn-ı arzuhâlde mezkûrü’l-ism Osman Çavuş b. Mehmed nâm kimesne muvâcehesinde mahrûse-i Galata’ya muzâfe kasaba-i Tophâne’de Sirkeci İskelesi nâm mahâlde kâin ma‘lûmü’l-hudûd bir bâb kahve dükkânı derûnunda mevcûde beyne’l-esnâf gedik ta‘bîr olunur eşyâ-i ma‘lûme mezbûr Osman Çavuş’un müstakıllen yedinde emvâli olmağla ben işbu târih-i i‘lâm senesi şehr-i Rebî‘ülevvel’inin üçüncü günü gedik-i mezkûru almak murâd eylediğimde mezbûr Osman Çavuş bin beş yüz guruşa bana bey‘ etmek üzere mukāvele olunup [61a] lâkin bey‘ ü şirâ ve teslîm ve tesellüm bulunmayıp ancak ben malımdan beş yüz guruş iskele-i mezbûrede hamallar kethudâsına teslîm ve mezbûr Osman Çavuş’a götürüver deyü emr eylediğimde ol dahi ba‘de’l-ahz mezbûra götürüp verdiğinde kabûl etmeyip almakdan ibâ vü imtinâ‘ eylediğinden mâ‘adâ gedik ta‘bîr olunan eşyâ-i mezkûreyi şehr-i mezbûrun yirmi üçüncü günü mahrûse-i mezbûre mahkemesinde huzûr-ı hâkimü’ş-şer‘de bin altı yüz guruş semen-i medfû‘ ve makbûza işbu hâzır bi’l-meclis Fethullah Beşe b. Mahmud’a bâ-hüccet bey‘ ve temlik ve teslîm etmekle hâlâ mezbûr Osman Çavuş semen olmak üzer makbûzu olan meblağ-ı merkūm bin altı yüz guruşu hâzır-ı mezbûra redd ü teslîm ve gedik-i mezkûru geri ahz birle mukāvelemiz üzere bin beş yüz guruşa bana bey‘ etmek üzere mezbûr Osman Çavuş’a tenbîh olunmak matlûbumdur deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmamağla müdde‘î-i mezbûr Mehmed Ağa da‘vâ-yı mezkûresiyle merkūm Osman Çavuş’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 25 min-Cemâziyelâhir sene 1223.