İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 444 Hüküm no: 428 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reşid’in Hacı Civelek Değirmeni’ndeki gedik hissesini diğer hissedar Mehmed Ali Ağa’ya üç bin kuruşa sattığı 3.000 guruşa değirmen mübâya‘ası Ma‘rûz Âsitâne-i aliyye’de Arabacılar mahallesinde vâki‘ el-Hâc Civelek Değirmeni demekle ma‘rûf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve ona isâbet eden sâir âlât-ı lâzıme-i ma‘lûmenin dört re’s bârgir hissesine mâlik olan derûn-ı arzuhâlde mezkûrü’l-ism Mehmed Reşid b. el-Hâc Ahmed Ağa meclis-i şer‘-i münîrde Uncular Kethudâsı Mustafa Ağa ve sâir nizâm ustaları hâzır oldukları hâlde altı re’s bârgir hissesine mâlik olan sâhib-i arzuhâl Mehmed Ali Ağa b. Abdullah muvâcehesinde ber-vech-i muharrer mâlik olduğum bir horos dört re’s bârgir hisse-i şâyi‘a-i mezkûremi tarafeynden bi’l-îcâb ve’l-kabûl bâtten ve sahîhan bi-safkatin vâhidetin üç bin guruşa merkūm Mehmed Ali Ağa’ya bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm üç bin guruşu benim hubûbât-ı mütenevvi‘a semenlerinden zimmetimde cânib-i mîrîye ma‘lûmü’l-esâmî tüccâra olan düyûnuma takasan havâle ve hubûbât hazînesi tarafından kabza memûra def‘ ü teslîme müşterî-i mezbûr emr ve tarafımdan tevkîl etmemle ol dahi ba‘de’l-kabûli’l-vekâle vech-i meşrûh üzere edâya müte‘ahhid olup ol-vechile sâlifü’l-beyân gedik ta‘bîr olunan âlât-ı lâzıme- i ma‘lûmenin i‘tibâr-ı merkūm üzere on re’s bârgir hissesi sâir âlât-ı lâzıme-i ma‘lûmesiyle merkūm Mehmed Ali Ağa’nın mülk-i müşterâ ve sahîh ve hakk-ı sırf-ı sarîhî olup benim vechen mine’l-vücûh aslâ ve kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i de‘âvîden müşterî-i merkūm Mehmed Ali Ağa’nın zimmetini kabûlü hâvî ibrâ-i âmm-i sahîh-i şer‘î ile ibrâ ve ıskāt eyledim dedikde ol dahi tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî 15 min-Cemâziyelâhir sene 1223.